Չեխիայի վարչապետ Պետր Ֆիալան հայտարարել է, որ Եվրամիության անդամ երկրներից ներմուծվող ապրանքների վրա ԱՄՆ-ի կողմից մաքսատուրքերի սահմանումը ոչ մի կողմի համար շահեկան չի լինի։
Ինչպես հաղորդում է «ՌԻԱ Նովոստին», այս մասին վարչապետը հայտնել է հուլիսի 14-ին լրագրողների հետ հանդիպման ժամանակ:
«ԵՄ-ից ապրանքների ներմուծման վրա ԱՄՆ կողմից 30 տոկոս մաքսատուրքի սահմանումը չի բխում ո՛չ Եվրամիության, ո՛չ Չեխիայի շահերից։ Որպես ազատ առևտրի և մաքսազերծ գոտիների կողմնակից՝ համոզված եմ, որ դա վնաս կհասցնի նաև ԱՄՆ-ին»,- ընդգծել է Չեխիայի վարչապետը։
Ըստ աղբյուրի՝ վերջին օրերին ԱՄՆ նախագահ Դոնալդ Թրամփը նամակներով տեղեկացրել է ամերիկյան արտադրողներին, որ օգոստոսի 1-ից Եվրամիությունից ներմուծվող մի շարք ապրանքների նկատմամբ կգործի 30 տոկոս մաքսատուրք։ Նամակներից մեկում նշվում է, որ եթե այդ ժամկետից առաջ կողմերը չհասնեն փոխընդունելի համաձայնության, մաքսատուրքը կմտնի ուժի մեջ։
