Ադրբեջանական Trend լրատվական գործակալության փոխանցմամբ՝ Առևտրի համաշխարհային կազմակերպությանը (ԱՀԿ) Ռուսաստանի անդամակցության վերաբերյալ ռուս-վրացական բանակցությունների հերթական փուլը տեղի կունենա հոկտեմբերի 7-8-ը։ Այս մասին այսօր տեղի ունեցած ճեպազրույցի ժամանակ հայտարարել է Վրաստանի փոխարտգործնախարար Դավիթ Ջալագանիան։
Վերջինիս խոսքերով՝ չի բացառվում, որ այս տարի դա լինի բանակցությունների վերջին փուլը. «ԱՀԿ-ին Ռուսաստանի անդամակցության հարցում վրացական պատվիրակությունն ունի հստակ և ակնհայտ դիրքորոշում։ Դժբախտաբար, նախնական տեղեկություններով՝ այս փուլում մենք Ռուսաստանի կոշտ դիրքորոշման մեջ արմատական փոփոխություններ չենք ակնկալում։
Վրացական կողմն աջակցում է ԱՀԿ-ին Ռուսաստանի անդամակցությանը՝ պահանջելով ռուս-վրացական սահմանին՝ Պսոուի ու Ռոքյան թունելի անցակետերում, թափանցիկ վերահսկողություն։ Եթե մեր պայմանները չընդունվեն, ապա մենք չենք կարող ԱՀԿ-ին անդամակցելու հարցում օգնել Ռուսաստանին։ Այդ դեպքում հնարավոր է՝ երկխոսությունը շարունակվի հաջորդ տարի»։
Հիշեցնենք, որ Ռուսաստանը փորձում է ԱՀԿ-ին անդամակցել 1993 թվականից, ինչի վրա շարունակ վետո է դնում Վրաստանը։ 2008 թվականի օգոստոսին տեղի ունեցած ռուս-վրացական հնգօրյա պատերազմից հետո առաջին անգամ Ռուսաստանն ու Վրաստանն այս տարվա մարտի 10-ին Շվեյցարիայի Բեռն քաղաքում ԱՀԿ-ին Ռուսաստանի անդամակցության համար նստեցին բանակցությունների սեղանի շուրջ, ինչը, սակայն, ավարտվեց անարդյունք։
Վրացական կողմը շարունակ առաջ է քաշում աբխազական ու հարավօսական հատվածներում մաքսային անցակետերի օրինականացման հարցը։ Մինչդեռ ռուսական կողմն առաջարկում է այդ խնդիրը քննարկել ոչ թե իր, այլ Աբխազիայի ու Հարավային Օսիայի հետ։
