«Ամենատխուր պատմությունն այն է, որ Լևոն Տեր-Պետրոսյանը կոչ արեց հաջորդ հանրահավաքին մարդկանց իրենց հետ բերել 5 մարդու, բայց 5 հոգի չբերեցին, ինչը նշանակում է, որ այն դաշտը, որին նա հավակնում է, գոյություն չունի, կամ այդ դաշտը դեռ ակտիվացված չէ: Հետևաբար, նա լուրջ խնդիր ունի լայնացնելու սոցիալական բազան: Երկխոսության հիմնական նպատակը դա է, բայց ոնց որ թե ակնկալվող արդյունքները չկան»,- «Առաջին լրատվական»-ի հետ զրույցում ասաց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը`անդրադառնալով շուրջօրյա հանրահավաքների փաստին:
Նրա խոսքով` հանրահավաքները փորձ են՝ լինել, մնալ հանրային կարծիքի կիզակետում, դուրս մղել նորությունների սյունակից մյուս կուսակցություններին, որ մնան իրենք և իշխանությունները: «ՀԱԿ-ը, փաստորեն, հանդես է գալիս որպես վերկուսակցական մի ուժ, և բոլոր կուսակցությունները մղվում են երկրորդ պլան, որովհետև նա երկխոսության չի գնում մյուս կուսակցությունների հետ, այլ՝ կոալիցիայի և դիմում է իշխանությանը` ասելով` եկեք, հրաժարական տվեք»,- ասաց Ա. Ադիբեկյանը:
«Տեսնենք, թե ինչ կլինի: Գուցե ավարտից հետո ևս մեկ հանրահավաք անեն ու տեսնեն դրա արձագանքը, որովհետև նման ակցիաների գնահատականները ոչ մի ուրիշ մեթոդով չես կարող հասկանալ: Ընդամենը պետք է լինի պրակտիկ գործողություն, այսինքն` հանրահավաք լինի, ու գա ոչ թե 10 հազար մարդ, այլ 50 հազար»,- նշեց սոցիոլոգը:
Նրա խոսքով` դա մտածված հնարք է, և պետք է տեսնել, դա կտա արդյունք, թե ոչ՝ ցույց կտան ընտրությունները:
