News Georgia-ի փոխանցմամբ՝ այսօր տեղի ունեցած ավանդական ճեպազրույցի ժամանակ Վրաստանի փոխարտգործնախարար Դավիթ Ջալագանիան անդրադարձել է վաղը կայանալիք Ժնևյան բանակցությունների հերթական փուլին.
«Վրացական պատվիրակությունն արդեն իսկ մեկնել է Ժնև։ Այն գլխավորում է Ազգային անվտանգության խորհրդի քարտուղար Գեորգի Բոկերիան, պատվիրակության կազմում է նաև Վրաստանի փոխարտգործնախարար Սերգի Կապանաձեն։
Ժնևյան բանակցություններում վրացական կողմը բարձրացնելու է 3 հիմնական հարց.
ա) Անհրաժեշտ է Վրաստանի օկուպացված շրջաններում գործի գցել անվտանգության միջազգային մեխանիզմները։ Դժբախտաբար, Ռուսաստանի դիրքորոշման պատճառով դրանցում որևէ միջազգային կազմակերպություն չկա։
բ) Պաշտոնական Թբիլիսին բարձրացնելու է նաև Վրաստանի դեմ ուժի չկիրառման մասին Ռուսաստանի ստանձնելիք պարտավորության հարցը։ 2010 թվականի նոյեմբերի 23-ին վրացական կողմը միակողմանիորեն ստանձնեց ուժի չկիրառման վերաբերյալ պարտավորվածություն, սակայն դժբախտաբար, ռուսական կողմը դրանից հետո նույն կերպ չվարվեց։ Դրա համար էլ վրացական կողմը բարձրացնելու է այդ հարցը՝ որպես տարածաշրջանում և հակամարտության գոտում կայունության հավելյալ երաշխիքների անհրաժեշտություն։
գ) Քննարկվելու է նաև հարկադիր վերաբնակների՝ իրենց տներն արժանիորեն ու անվտանգ վերադառնալու հարցը։
Հիշեցնենք, որ Ժնևյան բանակցության գործընթացը մեկնարկել է 2008 թվականի օգոստոսին տեղի ունեցած ռուս-վրացական հնգօրյա պատերազմից հետո։ Դրան մասնակցում են Վրաստանի, Ռուսաստանի, ԱՄՆ-ի, ինչպես նաև Հարավային Օսիայի, Աբխազիայի, ՄԱԿ-ի, ԵԱՀԿ-ի ու ԵՄ-ի պատվիրակությունները։
