«Մեր հանդիսատեսն ինձ օտար չէ: Երկար տարիներ չլինելով Հայստանում` ուզում եմ նվագել հայ հանդիսատեսի համար». այսօր լրագրողների հետ հանդիպմանը հայտարարեց ջութակահար Հրաչյա Ավանեսյանը (Բելգիա): Նա տեղեկացրեց նաև, որ «Վերադարձի» փառատոնի բացմանը`վաղը, կկատարի Պ. Ի. Չայկովսկու ջութակի կոնցերտը, իսկ հոկտեմբերի 9-ի մենահամերգին` սոնատներ:
«Ընտրեցի իրար հակասող սոնատներ, որ ավելի շատ կարողանամ հնարավորություններս ի ցույց դնել»,- ասաց ջութակահարը:
Մեկնաբանելով դասական երաժշտության նկատմամբ`ամբողջ աշխարհում մարող հետաքրքրության փաստը, Հ. Ավանեսյանն ասաց, որ դասական արվեստն իր կայուն տեղն ունի եթե ոչ մեծամասնության, ապա գոնե կրթված մարդկանց շրջանում: «Ցավոք, կրթված մարդիկ այսօր ավելի քիչ են»,- նշեց Հ. Ավանեսյանը:
Պատասխանելով հարցին` արդյոք չի՞ պատրաստվում վերադառնալ հայրենիք, երաժիշտը պատասխանեց, որ հուսով է` կգա մի ժամանակ, որ կվերադառնա, եթե հնարավորություն ունենա, սակայն միշտ իր համերգացանկում ներառում է հայ կոմպոզիտորների ստեղծագործություններ:
«Վերջերս Ճապոնիայում նվագեցի Կոմիտասի «Ծիրանի ծառը»: Մարդկանց համար դա նորություն էր, ազգային, և մարդիկ ավելի բաց են ընդունում»,- ասաց նա:
Հր. Ավանեսյանը ծնվել է 1986 թ., սովորել է Բրյուսելի Թագավորական կոնսերվատորիայում, 2007 թվականից սովորում է թագուհի Էլիզաբեթի երաժշտական քոլեջում` Ավգուստին Դումեյի մոտ: Մի շարք հեղինակավոր մրցույթների հաղթող է, նվագել է Բելգիայի, Դանիայի ազգային սիմֆոնիկ, Լոնդոնի կամերային նվագախմբի, Տոկիոյի «Մետրոպոլիտեն» սիմֆոնիկ նվագախմբի հետ:
Հր. Ավանեսյանը նվագում է Անտոնիո Ստրադիվարուսի` 1717 թ. ստեղծած «Պիատտի» ջութակով:
