«Յուրաքանչյուր մարդ իր անելիքը գիտի, ու յուրաքանչյուրն ինքն է իր կենսագրությունը ստեղծում: Դժվարանում եմ ասել`գրողները կգա՞ն Ազատության հրապարակ, թե՞ ոչ: Համենայնդեպս եկողներին կտեսնենք հրապարակում»,- «Առաջին լրատվական»-ի հետ զրույցում ասաց դրամատուրգ Կարինե Խոդիկյանը`խոսելով երկրի համար կարևոր փուլերում գրողների դիրքորոշման մասին:
Նրա խոսքով` այսօր կա դժգոհություն , որը վերաբերում է մեր կյանքի բոլոր բնագավառներին: Դժգոհ են իշխանության մեջ գտնվող անձանցից մինչև տաքսիստներն ու տրանսպորտի վարորդները ու շատ քչերն են, որ իսկապես գոհ են իրենց կյանքից:
«Չեմ պատկերացնում` ինչպե՞ս կարող են մարդիկ երջանիկ լինել, երբ շուրջը համատարած դժգոհություն է, աղքատություն, և որ ամենասարսափելի է` կա արտագաղթ»,- ասաց գրողը`շեշտելով, որ երբ մարդիկ ուզում են իրենց կյանքը փոխել, դա արդեն հեղափոխական իրավիճակ է, իսկ ներկայում շատերն են ուզում, որ իրավիճակը փոխվի:
Կ. Խոդիկյանի խոսքով`ինքը նաև հանրահավաքների է գնում, որովհետև որպես գրող պետք է տեղյակ լինի այն ամենից, ինչ կատարվում է:
«Ստեղծագործողը պետք է հավաքի օրվա համապատկերի ամեն մի մանրամասնը: Ես պետք է տեղյակ լինեմ` իմ շուրջը կատարվող դեպքերից, ու գնում եմ հանրահավաքների, որովհետև գրելու խնդիր ունեմ, քանի որ ուզում եմ գրել այսօրվա մեր կյանքի մասին ու չեմ պատկերացնում, թե գրողն ինչպե՞ս պետք է գրի հետագայում` առանց մասնակցելու այսօրվա իրադարձություններին»,- ասաց նա` շեշտելով, որ հրապարակում իր մասնակցությունը ոչ միայն համակիրի հետաքրքրություն է, այլև գրողի շահագրգռվածություն:
