«Առաջին լրատվական»-ի զրուցակիցն է ՀԱԿ Գյումրիի տարածքային կառույցի պատասխանատու Աշոտ Զաքարյանը:
– Շուրջօրյա հանրահավաքների անցկացման վերաբերյալ հայտարարությունն անելով՝ ՀԱԿ առաջնորդ Լևոն Տեր-Պետրոսյանը նաև նշեց, որ հնարավոր է նաև երկխոսության վերսկսում իշխանությունների հետ: Ձեր կարծիքով՝ նստացույցերի արդյունքում հնարավոր կլինի՞ հասնել երկխոսության վերսկսման, արդյո՞ք դա այն անհրաժեշտ ճնշումն է, որը կստիպի իշխանություններին գնալ զիջումների:
– Նստացույցը մեր պայքարի ձևերից ընդամենը մեկն է, իսկ թե ինչքանով հնարավոր կլինի դրա շնորհիվ վերականգնել« երկխոսություն» կոչվածը, կամ հասնել այլ շոշափելի արդյունքների, արդեն կախված է իշխանությունների քաղաքական կամքից, մարդկային բանականությունից: Ամեն դեպքում այսօր նստացույցի երրորդ օրն է, մենք մեկշաբաթյա նստացույց ենք հայտարարել և դեռ առջևում մի քանի օր կա և ժամանակն ինքն է ցույց տալու, թե ինչպիսին կլինեն առաջիկա զարգացումները:
– Իսկ ակնկալիք կա՞, որ նստացույցի մասնակիցները գալիք օրերի ընթացքում էլ ավելի կշատանան:
– Ուզում եմ հուսալ, որ ժողովուրդը փորձելու է իր մեջ վերագտնել քաղաքացու տեսակը և առաջնորդվելու է քաղաքացու տեսանկյունից, ինչի արդյունքում, բնականաբար, ավելանալու է թե՛ հասարակության մասնակցությունը, թե՛ նաև հասարակության որակյալ հատվածի մասնակցությունը:
– Պարո՛ն Զաքարյան, Լևոն Տեր-Պետրոսյանը նշեց, որ մեկ շաբաթ անց կորոշվի արդյո՞ք շարունակվելու են շուրջօրյա նստացույցերը, թե՝ ոչ: Ձեր գնահատմամաբ՝ որն է այն պայմանը, որի դեպքում հնարավոր կլինի դադարեցնել նստացույցերը, և Ձեր կարծիքով՝ արժե՞ դադարեցնել նստացույցերը, թե՞ անհրաժեշտ է էլ ավելի ակտիվ գործողությունների գնալ:
– Ես այն մարդկանցից մեկն եմ, ով շատ ավելի արմատական դիրքերից է հանդես գալիս: Ես կարծում եմ, որ մեր սկսած գործընթացը պետք է հասցնենք տրամաբանական ավարտին` հասնել արտահերթ նախագահական և խորհրդարանական ընտրությունների անցկացմանը: Իսկ թե ընթացքում ինչպիսի մարտավարական փոփոխություններ առաջ կքաշվեն, չեմ կարող ասել, ակնհայտ է մի բան, որ ժամ առ ժամ կարող է ամբողջապես նոր իրավիճակ ստեղծվել:
– Իսկ Ձեր կարծիքով՝ շուրջօրյա հանրահավաքները կստիպե՞ն իշխանություններին դեպի ժողովուրդն ու ընդդիմությունը քայլ կատարել:
– Ամեն ինչ պայմանավորված է հասարակության մասնակցությունից, որքանով հասարակության մասնակցությունը շատ ավելի վճռական կլինի, այնքան արագ իշխանությունը կփորձի գնալ անհրաժեշտ զիջումների: Ամեն ինչ ժողովրդի ձեռքում է, մենք ընդամենը փորձում ենք մեր այս գործողություններով հնարավորինս ակտիվացնել հասարակությանը և մասնակից դարձնել քաղաքական գործընթացներին: Հասարակությունն ինքն է որոշելու, թե ինքն ինչ է ուզում, և այդ որոշումը պիտի արտահայտված լինի կոնկրետ գործողություններով, իսկ այդ կոնկրետ գործողությունն էլ ենթադրում է անմիջական և շատ ակտիվ մասնակցություն նման քաղաքական ակցիաներին: Հավատացեք, մնացածը ժամանակի խնդիր է և անհրաժեշտ որոշումների հնարավոր կլինի շատ արագ հասնել:
– Այսինքն եթե հասարակությունը որոշի, որ մեկ շաբաթ նստացույցը բավական չէ, Կոնգրեսը կլսի՞ հասարակությանը:
– Ես կարծում եմ, Կնոգրեսը մշտապես պարտավոր է հասարակության կարծիքի հետ հաշվի նստել: Իսկ որպեսզի Կոնգրեսը հաշվի նստի հասարակության կարծիքի հետ, հասարակությունն ինքը պետք է մեծ մասնակցություն դրսևորի Կոնգրեսի կազմակերպած ակցիաներին: Իր ակտիվ մասնակցությամբ հասարակությունը ստիպելու է և՛ Կոնգրեսին, և՛ իշխանությանը իր հետ հաշվի նստել: Բոլոր հարցերի լուծման բանալին ժողովրդի ձեռքում է:
– Իսկ հասարակությունն ու Հայ ազգային կոնգրեսն իր սկսած գործում ունի՞արտաքին աշխարհի աջակցության ակնկալիքը:
– Իմ կարծիքով, մենք առաջին հերթին պետք է ապավինենք սեփական ուժերին և հենց մենք պետք է ստիպենք, որպեսզի միջազգային հանրությունը մեր հետ հաշվի նստի: Երբեք չպետք է հույս դնել որևէ գերտերության, կամ որևէ միջազգային հեղինակավոր կազմակերպության վրա, այլ պարզապես պետք է մեր գործողություններով ստիպենք, որ այն բազմակի ստանդարտները, որոնք կիրառվում են միջազգային կազմակերպությունների կողմից տարածաշրջանի և Հայաստանի նկատմամբ, այլևս չլինեն և փոխվի արտաքին աշխարհի վերաբերմունքը: Վերջին ամիսների ընթացքում մենք ականատես եղանք, թե ինչ էր տեղի ունենում արաբական աշխարհում: Երբ հասարակությունը շատ վճռական է իր իրավունքների վերականգման պայքարի գործում, նույն գերտերությունները, որոնք այս կամ այն արաբական երկրի բռնապետին համարում էին իրենց գործընկերը, կանգնեցին ժողովրդի կողքին ` անելով ամեն ինչ, որպեսզի տապալվի հենց իրենց նախկին գործընկեր բռնապետերի ռեժիմը: Այնպես որ այս հարցում էլ բանալին մեր ժողովրդի ձեռքում է:
