Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Վարշավայում վրացի լրագրողներին հայտարարել է, որ ԵՄ-ին անդամակցելու հարցը Վրաստանի համար ունի կենսական նշանակություն.
«Մենք չենք կարող միայնակ մնալ այսպիսի բարդ տարածաշրջանում, մենք պետք է դառնանք Եվրոպայի մի մասը։ Մեզ համար դա վճռորոշ հարց է՝ զարգանալու ու անվտանգության ոլորտներում։ Վրաստանի ապագան Եվրոպայում է և ոչ թե ԱՊՀ-ում, որից նա հրաժարվել է։
Երկու օրվա ընթացքում ես բազմաթիվ հանդիպումներ ունեցա եվրոպացի առաջնորդների հետ և ինձ համար կատարեցի երկու եզրահանգում։ Առաջինն այն է, որ բոլոր առաջնորդները հայտարարում էին ԵՄ-ին Վրաստանի անդամակցության և ԵՄ չափորոշիչներին Վրաստանի համապատասխանելու հնարավորության ու իրենց պատրաստակամության մասին, ինչը նախկինում երբեք չի եղել։ Բացի այդ, նրանք ընդգծել են, որ Վրաստանը բոլորից շատ է առաջ շարժվել ԵՄ-ին ինտեգրվելու ճանապարհին և այդ հարցում հանդիսանում է առաջատար։ Մենք ԵՄ-ին անդամակցելու հավակնորդների թվում համար առաջինն ենք։
Եվրոպական առաջնորդների կողմից այդպիսի խոստովանությունը նշանակում է, որ վերջին տարիներին ծանր պայմաններում ու լարված իրավիճակում մեր իրականացրած բարեփոխումները մեզ ավելի են մերձեցրել Եվրոպային։ Պատահական չէ, որ Վրաստանից արդեն սովորում են ԵՄ երկրները։ Օրինակ՝ մեզ մոտ եկել էին ուսումնասիրելու քրեակատարողական համակարգում մեր ունեցած փորձը։ Դա մասնավորապես վերաբերում է ֆրանսիացիներին, ովքեր ուսումնասիրում էին հանցավորության ու կոռուպցիայի դեմ պայքարի մեր փորձը»։
Հիշեցնենք, որ Վրաստանը պաշտոնապես ԱՊՀ կազմից դուրս է եկել 2009 թվականի օգոստոսի 18-ին։
