Այսօր՝ ապրիլի 23-ին, Վատիկանի Սուրբ Պետրոսի տաճարում մեկնարկել է ապրիլի 21-ին կաթվածից մահացած Հռոմի պապ Ֆրանցիսկոսի վերջին հրաժեշտի արարողությունը։ Նրա աճյունն արդեն բերվել է անձնական նստավայրից՝ Սուրբ Մարթայի տնից։
Արարողության մեկնարկից առաջ կարդինալ-կամեռլենգո Քևին Ֆարելը, որը պատասխանատու է հովվապետի հուղարկավորության արարողությունների կազմակերպման համար, մարմինը տեղափոխելուց առաջ կատարել է հոգեհանգստի կարգ, որից հետո Մայր տաճարում սկսել է պատարագը: Վատիկանի ղեկավարին հրաժեշտ տալու են եկել բազմաթիվ կարդինալներ, արքեպիսկոպոսներ, եպիսկոպոսներ ու եկեղեցու սպասավորներ, որոնք սգո թափորի առջևից երթով անցել են Սուրբ Պետրոսի հրապարակով: Այնտեղ է եղել նաև շվեյցարական գվարդիայի պատվո պահակախումբը։
Ֆրանցիսկոսը դեռ կենդանության օրոք որոշ ճշգրտումներ է կատարել՝ պարզեցնելով հրաժեշտի ընթացակարգը։ Սպասվում է, որ Հռոմի պապին հրաժեշտ տալու համար հրապարակում կհավաքվի մոտ 100 հազար հավատացյալ։ Հաշվի առնելով մարդկանց մեծ թիվը՝ Հռոմում հատուկ հսկողության տակ են վերցվել տրանսպորտային հանգույցներն ու Սուրբ Պետրոսի հրապարակը, իսկ երկնքում հայտարարվել է ոչ թռիչքային գոտու ռեժիմ, գործարկվել է անօդաչու թռչող սարքերի որսման համակարգը:
Ֆրանցիսկոս պապի հրաժեշտի արարողությունը կտևի մինչև ապրիլի 25-ը, ապրիլի 26-ին տեղի կունենա նրա հուղարկավորությունը։
