ՌԴ նախագահի ներկայացուցիչ Կիրիլ Դմիտրիևը մեկնաբանել է Վաշինգտոնում անցկացված բանակցությունների արդյունքները՝ նշելով, որ հանդիպել է Դոնալդ Թրամփի վարչակազմի «կարևոր անդամների» հետ: Նրա խոսքով՝ ԱՄՆ-ն «լսում է Ռուսաստանի դիրքորոշումը» և պատրաստ է երկխոսության. գրում է BBC-ն։
Դմիտրիևը չի հստակեցրել, թե կոնկրետ ում հետ է հանդիպել, սակայն ոչ պաշտոնական տեղեկություններով՝ նա զրուցել է Թրամփի հատուկ ներկայացուցիչ Սթիվ Ուիթքոֆի հետ:
«Մենք հստակ տեսնում ենք, որ Թրամփի վարչակազմը, ի տարբերություն Բայդենի, հակված է խնդիրների լուծմանը: Նրանք վարվում են չափազանց հարգալից, հաշվի են առնում Ռուսաստանի դիրքորոշումը, շատ հարցեր են տալիս և փնտրում են փոխզիջումներ: Սա այն կառուցողական մոտեցումն է, որն ընտրվել է»,- ասել է նա լրագրողներին:
Դմիտրիևի խոսքով՝ բանակցությունների գլխավոր թեմաներից մեկը եղել է ռուս-ամերիկյան հարաբերությունների վերականգնումը: «Թրամփի վարչակազմը նպատակ ունի լուծել ռուս-ամերիկյան հարաբերությունների հետ կապված բոլոր հարցերը: Նրանք, անկասկած, պատրաստ են զբաղվել աշխարհաքաղաքական խնդիրներով և ուշադրություն են դարձնում Ռուսաստանի տեսակետներին բազմաթիվ հարցերում»,- հավելել է նա:
Դմիտրիևը նաև անդրադարձել է Ռուսաստանի և ԱՄՆ-ի միջև ուղիղ ավիահաղորդակցությունը վերականգնելու հնարավորությանը. «Փաստացի, աշխատանքներ են տարվում ուղիղ ավիահաղորդակցությունը վերականգնելու ուղղությամբ, և մենք հույս ունենք առաջընթաց գրանցել այս հարցում»,- նշել է նա։
«Դեռևս մի շարք հանդիպումներ կպահանջվեն, որպեսզի մենք կարողանանք լուծել մեր բոլոր տարաձայնությունները»,- ասել է Ռուսաստանի նախագահի ներկայացուցիչը:
Սպիտակ տունը դեռևս չի արձագանքել բանակցությունների արդյունքներին:
