Վաշինգտոնի ոստիկանությունը ստիպված է եղել արձագանքել, երբ ամերիկյան կայքերից մեկում հայտնվել է մի տեղեկություն, համաձայն որի՝ ԱՄՆ կոնգրեսականները պատանդ են վերցրել մի խումբ աշակերտների: Ինչպես գրել էր The Onion կայքը, որը հայտնի է իր հումորային տեղեկություններով ու կատակներով, ԱՄՆ կոնգրեսականները Կապիտոլիում եկած աշակերտներին պատանդ են վերցրել, ինչն էլ ոստիկաններին տագնապ հայտարարելու առիթ էր տվել:
Կայքում գրվել էր, որ աշակերտներին պատանդ են վերցրել Ներկայացուցիչների պալատի մի խումբ ներկայացուցիչներ՝ պալատի խոսնակ Ջոն Բեյների գլխավորությամբ: Նշվում էր, որ կոնգերսականները զինված են։ Նրանք բարիկադներով պատսպարվել են Ռոտոնդա դահլիճում և պահանջում են 12 միլիոն դոլար փրկագին, որը չվճարելու դեպքում խոստացել են սպանել պատանդներին:
