Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին Վարշավայում տեղի ունեցող «Արևելյան գործընկերության» գագաթնաժողովի շրջանակներում հանդիպել է ԵՄ արտաքին քաղաքականության և անվտանգության հարցերով բարձրագույն հանձնակատար Քեթրին Էշթոնի հետ։ Հանդիպմանը ներկա է գտնվել նաև ԵՄ-ում Վրաստանի դեսպան Սալոմե Սամադաշվիլին։
Վերջինս հանդիպումից հետո հայտարարել է. «Էշթոնն ընդգծել է, որ ԵՄ-ն հաստատապես աջակցում է Վրաստանի տարածքային ամբողջականության և ինքնիշխանության սկզբունքին, և իր գործընկեր երկրներից նույնպես պահանջելու է անել նույնը։
Էշթոնը շնորհավորել է Վրաստանի նախագահին այն բարեփոխումների կապակցությամբ, որոնք իրականացվել են ազատ առևտրի նախագծի իրագործման ճանապարհին։ Էշթոնը վստահություն է հայտնել, որ շուտով Վրաստանի ու ԵՄ-ի միջև կմեկնարկեն տվյալ խնդրի շուրջ բանակցությունները»։
Հիշեցնենք, որ Վարշավայում գտնվող Վրաստանի փոխարտգործնախարար Թոռնիկե Գորդաձեն «Ռուսթավի 2» հեռուստաընկերության երեկվա եթերում հայտարարել էր, թե Վրաստանը կոնկրետ արդյունքներ է ակնկալում «Արևելյան գործընկերության» գագաթնաժողովից.
«Գագաթնաժողովից մենք հստակ ազդանշաններ ենք ակնկալում Վրաստանի ու ԵՄ-ի միջև ազատ առևտրի գոտու ձևավորման մասին։ Մենք սպասում ենք կոնկրետ ժամկետների հայտարարություններին, թե երբ են մեկնարկելու այդ մասին բանակցությունները։ Վրաստանը համարվում է «Արևելյան գործընկերություն» ծրագրում ներառված ամենահաջող երկրներից մեկը»։