Չինաստանում համացանցից օգտվում է մոտ կես միլիարդ մարդ: Սա ամենաշատն է ողջ աշխարհում: Այս մասին հաղորդում է պետական Xinhua լրատվական գործակալությունը: Չինաստանի կառավարության տեղեկատվության բյուրոյի ղեկավար Վան Չենն ասել է, որ հուլիսից հետո, երբ վերջին անգամ հրապարակվել են վիճակագրական տվյալները, ավելի քան 15 միլիոն մարդ միացել է համացանցից օգտվողների բանակին:
Սակայն համացանցից օգտվողների թիվը լուրջ մտահոգություն է առաջացնում այդ երկրի իշխանությունների մոտ, քանի որ այս գործիքը հնարավոր է օգտագործել սոցիալական ընդվզումներ կազմակերպելու համար: Այս կապակցությամբ իշխանությունները որոշակի գործողությունների են դիմում, որպեսզի սահմանափակեն չինացիների մուտքն անցանկալի կայքեր: Այդ համակարգն անվանել են «Չինական մեծ հրե պատ»` Չինական մեծ պատի նման:
Սակայն իշխանություններին չի հաջողվում վերահսկել մեծ տարածում ստացող Twitter միկրոբլոգների կայքը և նմանատիպ այլ կայքեր, որտեղ մարդիկ իրենց կարծիքն են արտահայտում հասարակական փոխհարաբերությունների վերաբերյալ: Վան Չենը նշել է, որ Չինաստանում այսօր կա մոտ 300 միլիոն բլոգեր, իսկ գյուղական վայրերում համացանցից օգտվում է մոտ 130 միլիոն մարդ:
