Ճիշտ է սահմանադրական ճանապարհով իշխանափոխությունը: Այսօր «Առաջին լրատվականի» հետ զրույցում նման տեսակետ հայտնեց Հայ ազգային կոնգրեսին մաս կազմող «Ժողովրդավարական ուղի» կուսակցության նախագահ Մանուել Գասպարյանը` խոսելով ՀԱԿ սեպտեմբերի 30-ի հանրահավաքի գործողությունների, կոչերի և կարգախոսների շուրջ:
«Հանրահավաքի գործողությունները դեռ կանխորոշված չեն, հավաքվածների տրամադրությունից կհետևի թե՛ քայլերի, թե՛ գործողությունների մի նոր փուլ: Հանրահավաքին բազմաթիվ կարծիքներ են հնչում, ձևավորվում է որոշումների կայացման պրոյեկտ»,- նշեց Մ.Գասպարյանը` ընդգծելով, որ գործողությունները պետք է լինեն շատ ավելի կտրուկ և կոշտ: «Կտրուկ՝ ժողովրդի սպասելիքներն արդարացնելու համար: Հնարավոր է լինի նստացույց, շուրջօրյա հանրահավաքներ, պետք է փորձենք պարտադրել իշխանություններին արտահերթ ընտրություններ»,- մեկնաբանեց «Ժողովրդավարական ուղի» կուսակցության նախագահը: Նա նաև ասաց, որ ժողովրդի մոտ սպասելիքներն ավելի են, քան այն գործողությունները, որ ընդդիմությունը պատրաստվում է անել:
Մանուել Գասպարյանը խոսեց նաև «Սկսել ա» կարգախոսի շուրջ, որը, նրա մեկնաբանմամբ, նշանակում է, որ ավարտվել է երկխոսության բանակցային փուլը և սկսվել է մի նոր փուլ: Հարցին՝ կհաջողվի՞ արդյոք այս նոր փուլն այն դեպքում, երբ եղել են բազմամարդ հանրահավաքներ, պատասխանեց, որ ժողովրդավարությունն է այդպես: «Եթե այսօր հնարավոր է մի բանի հասնել, ապա կարծիքներով և պահանջներով, որից միանշանակ իշխանությունները խուսափում են, քանի որ հանրահավաքի բազմամարդությունը բերում է անհանգստության: Այդ պատճառով հանրահավաքները ժողովրդի կողմից պետք է ավելի ուշադրության կենտրոնում լինեն և նրանց մասնակցությունն ավելի մեծ լինի, որից հետո մեր պահանջը կհասնի տեղ»,- ասաց Մ.Գասպարյանը` հույս հայտնելով, որ իշխանությունը խոհեմ կգտնվի և լրջորեն կմտորի, ավելի սթափ կգնահատի իրավիճակը: