Մեծ Բրիտանիայի արտաքին գործերի նախարար Վիլյամ Հեյգը հայտարարել է, որ խիստ մտահոգված է այն տեղեկություններով, թե Իրանում կախաղան է հանվելու քրիստոնյա հոգևորականը, որը հրաժարվել է նորից իսլամադավան դառնալ: Այս մասին հաղորդում է «Ազատություն» ռադիոկայանը:
Հեյգը կոչ է արել Իրանի իշխանություններին հարգել մարդու իրավունքների պաշտպանության ոլորտում ստանձնած պարտավորությունները և աջակցել հոգևորական Յուսեֆ Նադերխանի նկատմամբ կայացված մահապատիժը չեղյալ համարելու գործին: Ավելի վաղ Նադերխանի մահապատժի որոշումը բեկանելու կոչով էր հանդես եկել ԱՄՆ Կոնգրեսի Ներկայացուցիչների պալատի խոսնակ Ջոն Բայները: Տեղեկացնենք, որ Յուսեֆ Նադերխանը ձերբակալվել էր 2009 թ., նրան մեղադրանք էր առաջադրվել կրոնափոխության համար: