Հայաստանում Ֆրանսիայի դեսպան Դըկոտինյին փետրվարի 21-ին այցելել է պաշտպանության նախարարություն և հանդիպում ունեցել Սուրեն Պապիկյանի հետ: Ըստ հաղորդագրության՝ հանդիպմանը քննարկվել է հայ-ֆրանսիական գործակցությունը, մասնավորապես Ֆրանսիայի պաշտպանության նախարար Լըկորնյուի հետ պայմանավորվածությունների կատարման ընթացքը: Սահո՞ւն է ընթացքը, թե՞ կան հարցեր, հստակեցման կարիք ունեցող ասպեկտներ, հայտնի չէ: Բնական է, որ տեղեկատվությունը բաց չէ:
Ֆրանսիայի դեսպանի հետ Սուրեն Պապիկյանի հանդիպումը, սակայն կարող է ունենալ թերևս հետաքրքրություն առաջացնող հնարավոր մեկ այլ հետաքրքիր շերտ, որը, անշուշտ, չէր կարող տեղ գտնել պաշտոնական հաղորդագրությունում: Հատկանշական է, որ Ֆրանսիայի դեսպանը Պապիկյանի հետ հանդիպում է փաստորեն նրա Հնդկաստան կատարած այցից հետո: Հայաստանի ՊՆ նախարարը պատվիրակությամբ Հնդկաստան էր այցելել ռազմական ավիացիայի ցուցահանդեսի մասնակցելու համար: Այցը մոտ տասն օր առաջ էր, դրա ընթացքում Պապիկյանը նաև հանդիպումներ է ունեցել պաշտոնյաների, այդ թվում՝ Հնդկաստանի պաշտպանության նախարարի հետ:
Հետո Սուրեն Պապիկյանը մասնակցել է Մյունխենի անվտանգության համաժողովին: Այստեղ ևս, եղել են երկկողմ հանդիպումներ, սակայն եվրոպական ուղղության մասով Ֆրանսիային, թերևս, կան հետաքրքրող քիչ հանգամանքներ: Ֆրանսիան, անկասկած, առավելագույնս տիրապետում է եվրոպական տրամադրություններին և անցուդարձին: Հայաստանում Ֆրանսիայի դեսպանի այցը պաշտպանության նախարարություն, ուշադրություն է գրավում Սուրեն Պապիկյանի Հնդկաստան այցի ժամանակագրական հաջորդականության առումով: 2024 թվականի ամռանը Հայաստան ժամանած Հունաստանի պաշտպանության նախարար Դենդրիասը Սուրեն Պապիկյանի հետ համատեղ ասուլիսում չէր բացառել Հունաստան-Ֆրանսիա-Հայաստան-Հնդկաստան քառակողմ պաշտպանական գործակցության հնարավորությունը:
Սա, իհարկե, միջերկրածովյան գոտու անվտանգության համակարգի հեռանկարի հետ առնչվող էական հարց է, այլ ոչ թե պարզապես ցանկությունների կամ նախասիրությունների խնդիր: Հնդկաստանն այդ իմաստով Փարիզի համար կարող է դիտվել Կենտրոնական Ասիան Միջերկրածովյան ավազանին կապող շղթայի կարեւորագույն օղակներից մեկը: Իսկ շղթան բնականաբար չի կարող գոյություն ունենալ առանց Հայաստանի: Նաև, իհարկե, առանց Իրանի: Այդ իմաստով հատկանշական է Հայաստանում Իրանի դեսպանի հայտարարությունը, որ Հայաստանն ու Իրանը քննարկում են ռազմավարական գործընկերության փաստաթուղթ:
Հայտնի է, որ Հայաստանում տեղի է ունեցել Ֆրանսիայի և Իրանի դեսպանների քննարկում զգայուն հարցերի առնչությամբ, մասնավորապես Սյունիքի, որի կապակցությամբ դեսպան Դըկոտինյին հայտարարել էր, որ Իրանի և Ֆրանսիայի մոտեցումները շատ մոտ են: Այդ իմաստով, իսկ մոտ կլինե՞ն օրինակ Սյունիքում Իրանի և Ֆրանսիայի գլխավոր հյուպատոսությունները: Իրանը Կապանում բացել է այն վաղուց, իսկ Ֆրանսիան արտահայտել մտադրություն՝ երկու տարի առաջ, ԱԳՆ նախարարի մակարդակով, սակայն չի շարունակել թեմայի հրապարակային ծավալում մինչ այժմ:
