Երեկ ՄԱԿ-ի Գլխավոր ասամբլեայում Ադրբեջանի արտգործնախարար Էլմար Մամեդյարովի ելույթից հետո Հայաստանի ու Ադրբեջանի պատվիրակությունների միջև տեղի են ունեցել քննարկումներ:
Հայաստանի արտգործնախարարության մամուլի և տեղեկատվության վարչության փոխանցմամբ՝ ՄԱԿ-ում Հայաստանի մշտական ներկայացուցիչ, դեսպան Կարեն Նազարյանն իր խոսքում նշել է, որ Մամեդյարովի ելույթում Հայաստանի ու Լեռնային Ղարաբաղի մասին հղումները նրա երևակայության արդյունք են, ով դեռևս կարծում է, թե սառը պատերազմի շրջանի քարոզչությունն ու ՄԱԿ-ում հակահայկական հայտարարությունները կարող են արդյունավետ գործիք հանդիսանալ իր երկրի դիրքերը ԵԱՀԿ-ի Մինսկի խմբի միջնորդությամբ ընթացող բանակցություններում ամրապնդելու համար. բանակցություններ, որոնք նպատակաուղղված են Լեռնային Ղարաբաղի հիմնահարցի համապարփակ, այլ ոչ թե քայլ առ քայլ կարգավորմանը, ինչպես նշում է Ադրբեջանի ԱԳ նախարարը:
Հերքելով ՄԱԿ-ի բանաձևերում Հայաստանի «ագրեսիայի», Հայաստանի զինված ուժերի դուրսբերման պահանջների, ինչպես նաև 20 տոկոս տարածքների զավթման արդյունքում 1 միլիոն փախստականների մասին ձևակերպումների առկայությունը` Նազարյանը ընդգծել է, որ նախարարի ելույթում հնչած մեղադրանքներն ու փաստերի նմանօրինակ աղավաղումներն անհիմն են, անարդյունավետ ու վնասում են բանակցությունների ընթացքին, միջազգային կազմակերպությունների աշխատանքին` արհեստականորեն ձգձգելով կառուցողական այն քայլերը, որոնք անհրաժեշտ են Լեռնային Ղարաբաղի ժողովրդի պահանջները բավարարելու համար: Նշվել է նաև, որ Ադրբեջանն է սկսել լայնամասշտաբ ռազմական գործողությունները Ղարաբաղի նկատմամբ՝ ի պատասխան վերջինիս ժողովրդի կողմից ինքնորոշման իր իրավունքի կիրառման:
Կարեն Նազարյանը հայտարարել է, որ եթե Ադրբեջանն աղավաղված փաստերի միջոցով մոլորության մեջ է գցում իր ժողովրդին, ապա դա դեռևս չի նշանակում, որ նույնը կարող անել նաև միջազգային հանրության հետ:
