Հայ Ազգային Կոնգրեսի ս/թ սեպտեմբերի 30-ի համապետական հանրահավաքի նախօրեին իշխանությունները, մասնավորապես ՀՀ Ոստիկանության Գյումրու բաժինը, հերթական անգամ գերազանցելով Սահմանադրությամբ իրենց վերապահված լիազորությունները, սկսել են տոտալ վերահսկողությունն ու ահաբեկումների իր գործելաոճը հանրահավաքի մասնակիցներին Երևան տեղափոխոխ մարդատար ավտոմեքենաների վարորդների նկատմամբ:
Դատապարտելով ոստիկանների նման գործունեությունը, հերթական իշխանազանցության բոլորիս հայտնի գործելակերպը, դիմում ենք ՀՀ Ոստիկանության ղեկավարությանը` սանձելու իրենց Գյումրիի ենթակաների ինքնամատույց մղումները: Իսկ եթե նրանք կատարում են վերադասների հրամաները, ապա զգուշացնում ենք, որ մեր քաղաքացիների ազատ տեղաշարժի և Սահմանադրական մյուս իրավունքնների խոչընդոտումը քրեորեն պատժելի արարք է և վաղեմության ժամկետ չունի:
Միաժամանակ կոչ ենք անում ձեզ մեր հանրահավաքների մասնակցությունը խոչընդոտելու փոխարեն պայքարել հանցավորության և հանցագործների դեմ, որը դարձել է մեր կյանքի անբաժանելի նորմը՝ թմրամոլներից մինչև կազմակերպված բանդաներ, սպանություն-ինքնասպանություններից մինչև«ռազբոյ-ռազբորկաններ»:
ՀԱԿ Գյումրու գրասենյակը անկախ ոստիկանական մանիպուլյացիաներից, հաստատակամ կանգնած է Համաժողովրդական Շարժման դիրքերում՝ հանրապետությունում օր առաջ օրինակարգ իշխանություն հաստատելու վճռականությամբ:
Հայ Ազգային Կոնգրեսի Գյումրու տարածքային գրասենյակ
ք.Գյումրի
28.09.2011
