ՌԴ նախագահի խոսնակ Պեսկովը հայտարարել է, որ Ռուսաստանը պատրաստ է օժանդակություն ցուցաբերել Իրանի միջուկային ծրագրի դիվանագիտական լուծումների հարցում: Նա հայտարարել է, որ Պուտինն ու Թրամփը հեռախոսազրույցի ընթացքում քննարկել են Իրանի միջուկային ծրագրի հարցը, թեև դա չի եղել առանցքայինը: Պեկոսվի խոսքով՝ Իրանի հետ ՌԴ հարաբերությունը որևէ կերպ չի փոխվի ռուս-ամերիկյան բանակցության ընթացքում:
Ինչպես հայտնի է, ռուս-իրանական հարաբերությունը 2025 թվականի հունվարի 14-ից տեղավորվել է ստորագրված ռազմավարական համապարփակ գործընկերության պայմանագրի շրջանակում: Պայմանագիրը երկու երկրների խորհրդարաններում դեռևս վավերացված չէ, սակայն ուղենիշը և ընդգրկումն ու խորությունը սահմանված է:
Պեսկովի հայտարարությունը, որ Թրամփն ու Պուտինը քննարկել են Իրանի միջուկային ծրագրի հարցն ու Մոսկվան պատրաստ է նպաստել դրա դիվանագիտական լուծմանը, ըստ էության, թերևս, խոսում է այն մասին, որ Իրանը կարող է տեղավորվել Ռուսաստանի միջուկային «հովանոցի» ներքո՝ իհարկե դե ֆակտո, քանի որ ռուս-իրանական պայմանագրում ուղիղ անդրադարձ չկա միջուկային բաղադրիչին: Միևնույն ժամանակ, այլ տարբերակ գործնականում չկա, եթե ԱՄՆ Իսրայելին է տրամադրում ավելի քան 900 կիլոգրամանոց ծանր ռումբեր, որոնք ի վիճակի են խոցել գետնափոր մեծ խորություններ, այլ կերպ ասած՝ կարող են սպառնալ Իրանի միջուկային օբյեկտներին:
Իհարկե, միարժեք բարդ է ասել, թե դրանք, որքան են խորը և պաշտպանված, այդուամենայնիվ, Իսրայելին ծանր այդ ռումբերի տրամադրումը, անշուշտ, խոսուն գործողություն է: Իրանն այդ պարագայում կամ դառնում է անպաշտպան, կամ մնում է թերևս պաշտպանվածության մի տարբերակ՝ միջուկային վահան: Գրեթե բոլոր նշանները կան խոսելու այն մասին, որ Թեհրանն ըստ ամենայնի միջուկային զենք արդեն իսկ ունի, սակայն մի բան է ունենալ զենքը, մեկ այլ բան՝ ունենալ դրա էֆեկտիվ կիրառման տեխնոլոգիաներ:
Այստեղ է, որ, ըստ ամենայնի, Թեհրանը կհայտնվի ռուսական միջուկային վահանի ներքո, ինչն էլ թերևս դառնում է ռուս-ամերիկյան քննարկումների առարկա, որի համատեքստում էլ թերևս Վաշինգտոնը կայացրել է Իսրայելին ծանր ռումբեր հատկացնելու որոշումը՝ իր հերթին բալանսի պահպանության համար:
