Lenta.ru-ն, վկայակոչելով գերմանական Zeit պարբերականը, հայտնում է, որ 2010 թվականի պաշտոնական վիճակագրական տվյալներով, Գերմանիայի մոտ 15.7 միլիոն բնակիչներ սերում են ներգաղթյալների ընտանիքներից, ինչը կազմում է երկրի բնակչության մոտ 1/5-ը (յուրաքանչյուր 5-րդ մարդը)։ Ընդ որում, ներգաղթյալների կեսից ավելին (8.6 միլիոն մարդ) ունի գերմանական քաղաքացիություն։
Ներգաղթյալների մոտ 70 տոկոսը բաժին է ընկնում եվրոպական երկրներին։ Օտարազգիների ամենաակտիվ մատակարարը Թուրքիան է (14.1 տոկոս), ապա գալիս են Լեհաստանը (10.5 տոկոս) և Ռուսաստանը (9.2 տոկոս)։
Երկրի մնացյալ բնակչությունից ներգաղթյալները տարբերվում են մի շարք հանգամանքներով. ա) տարիք՝ միջին հաշվարկով նրանք 11 տարով ավելի երիտասարդ են, բ) ավելի ցածր կրթամակարդակ՝ պաշտոնապես 15 տոկոսը չունի միջնակարգ կրթություն, երբ տեղական բնակչության մոտ այդ ցուցանիշը կազմում է 2 տոկոս, մասնագիտական կրթություն չունի ներգաղթյալների 45 տոկոսը՝ ընդդեմ մնացյալ բնակչության մոտ 20 տոկոսի, գ) սոցիալական կարգավիճակ՝ միջին հաշվարկով ներգաղթյալներն ունեն ավելի ցածր սոցիալական կարգավիճակ, դ) գործազրկություն՝ ներգաղթյալների շրջանում գործազրկությունը երկու անգամ բարձր է, քան՝ տեղաբնիկների շրջանում, ներգաղթյալները կրկնակի անգամ ավելի հաճախ են հայտնվում աղքատության շեմին։
Հիշեցնենք, որ Գերմանիայում պաշտոնապես ներգաղթյալ են անվանում նրանց, ովքեր Գերմանիայում բնակություն են հաստատել 1950 թվականից հետո, ինչպես նաև նրանց սերունդներին։ Դրանով իսկ Գերմանիայի ներգաղթյալների մոտ 1/3-ն արդեն իսկ ծնվել է նրա տարածքում։
