Երևանում գերեզմանատների տարածքներն արդեն գերազանցում են քաղաքի ընդհանուր տարածքի 10%-ը: Երևանում կա 21 գերեզմանատուն, որից 14-ն ամբողջությամբ փակ են, իսկ գործող 7-ում էլ տեղերն են սահմանափակ:
«Առաջին լրատվականի» հետ զրույցում Սուրբ Սանդուխտ կույսի անվան տիկնանց միության նախագահ Արտեմիս Լեփեջյանը հայտնեց, որ առաջին հերթին գերեզմանատներում յուրաքանչյուրին պետք է սահմանափակ տարածք տրվի, և ոչ թե՝ ով որքան փող վճարի, այնքան տան. «10-20, նույնսիկ 50 քմ տարածք են տալիս, որտեղ կարելի է 10 դիակ տեղավորել: Առաջին հերթին պետք է սահմանափակվեն տարածքները: Ով այստեղ չէ և շատ տարածք ունի, պետք է նրանցից ետ վերցվեն տարածքները»:
Ըստ նրա՝ աշխարհում չկա մայրաքաղաք, որտեղ տարածքի 10%-ը գերեզմանատուն լինի: Արտասահմանում 1 մարդուն 2-2.5 քմ տարածք է բաժին ընկնում, ընդ որում երկրորդին վրան են թաղում: Ա.Լեփեջյանը նաև նշեց, որ գերեզմանատները բարձր ծառերով պետք է շրջապատվեն, որովհետև թույն է արտազատվում դրանցից: Հայաստանում այս կարգը նույնպես չի պահպանվում:
Գերեզմանատունը առնվազն 30 մ հեռու պետք է լինի բնակավայրից: Ա.Լեփեջյանի խոսքով՝ մեր գերեզմանները շատ մոտ են բնակավայրերին, արդյունքում երեխաներն առավոտից երեկո տեսնում են լացող մարդկանց, թաղումներ, ինչը հոգեբանական սթրես է և նրանց համար մահը դառնում է խաղալիք:
«Սա մեծ նշանակություն ունի հետագա սերնդի սթրեսային վիճակի առումով»,- ասաց Ա.Լեփեջյանը:
«Երևաննախագիծ» ինստիտուտի գործադիր տնօրեն Սիրեկան Օհանյանը տեղեկացրեց, որ մայրաքաղաքի գլխավոր հատակագծով և ճշգրտման նախագծով գերեզմանոցների տարածքների ընդլայնման խնդիր չի նախատեսվում. «Մենք առաջարկում ենք հնարավորինս եղածը կոնսերվացնել, հատկացված տարածքներից շրջանակը չմեծացնել, և Երևան քաղաքում ունենալ դիակիզարան»:
Ս.Օհանյանը հիշեցրեց, որ Հայ Առաքելական եկեղեցին էլ իր դիրքորոշումն ունի դիակիզարանի մասին: «Խնդիրն այստեղ քաղաքական է»,- նշեց Ս.Օհանյանը:
