Թուրքական Haber Türk թերթի փոխանցմամբ՝ Թուրքիայում քրեական գործ է հարուցվել 31 տարի առաջ՝ 1980 թվականի սեպտեմբերի 12-ին, Թուրքիայի պատմության մեջ տեղի ունեցած ամենաարյունալի ռազմական հեղաշրջման գործով։
Նշվում է, որ այս գործի հարուցումը հնարավոր է դարձել այդ ռազմական հեղաշրջումից ուղիղ 30 տարի անց՝ 2010 թվականի սեպտեմբերի 12-ին, Թուրքիայի վարչապետ Էրդողանի գլխավորած «Արդարություն ու զարգացում» կուսակցության (ԱԶԿ) նախաձեռնած սահմանադրական բարեփոխումների փաթեթի հաստատման վերաբերյալ հանրաքվեի անցկացումից հետո, երբ դրան կողմ արտահայտվեց մասնակիցների 58 տոկոսը։
Հանրաքվեի արդյունքներով՝ Թուրքիայի Սահմանադրությունից վերացվեց 15-րդ հոդվածը, որն անձեռնմխելիություն էր շնորհել 1980 թվականի ռազմական հեղաշրջման կազմակերպիչներին։
Այժմ այդ հեղաշրջման կազմակերպիչ, Թուրքիայի 17-րդ գլխավոր շտաբի պետ և հեղաշրջման արդյունքում Թուրքիայի 7-րդ նախագահ դարձած 94-ամյա Քենան Էվրենը պետք է հեղաշրջումից 31 տարի անց պատասխանատվություն կրի դրա համար (ավելի վաղ Էվրենը, զգալով մոտալուտ վտանգը, հայտարարել էր, որ ավելի շուտ ինքնասպանություն կգործի, քան պատասխանատվություն կկրի այդ ռազմական հեղաշրջման համար.- 1in.am)։
Բացի Էվրենից, դա վերաբերում է նաև հեղաշրջման ժամանակ Թուրքիայի ազգային անվտանգության խորհրդի միակ կենդանի մնացած անդամ Թահսին Շաշինքայային։ Նրանք մեղադրվում են «սահմանադրական օրենքների վրա զինված հարձակման» և «հեղաշրջման կազմակերպման» մեջ։
Հիշեցնենք, որ 1980 թվականի սեպտեմբերի 12-ին Թուրքիայի զինված ուժերի գլխավոր շտաբի պետ, բանակի գեներալ Քենան Էվրենի իրականացրած ռազմական հեղաշրջման արդյունքում արձակվեց երկրի խորհրդարանը, տապալվեց Սուլեյման Դեմիրելի գլխավորած կառավարությունը։ Դեմիրելը, ինչպես նաև ընդդիմության առաջնորդներ Բյուլենթ Էջևիթն ու Ալփասլան Թյուրքեշը ձերբակալվեցին։ Երկրում փակվեցին բոլոր քաղաքական կուսակցությունները, և մտցվեց ռազմական դրություն։
Հեղաշրջման նախապատրաստման համապատասխան հիմքի ստեղծման համար ձախ և աջ արմատականների միջև մինչև հեղաշրջման առավոտ հրահրված բախումներում զոհվեց 2000 մարդ, հեղաշրջման արդյունքում բանտարկվեց 650,000 մարդ, ոստիկանությունում հարուցվեց 1,683,000 գործ, քաղաքական պատճառներով հարուցված 210,000 գործի շրջանակներում դատարանում հայտնվեց 230,000 մարդ, 517 մարդ ստացավ առավելագույն պատժաչափ, միևնույն ժամանակ այդպիսի պատժաչափ էր սպառնում 7000 հոգու, 388,000 մարդ զրկվեց անձնագրից, աշխատավայրից վտարվեց մոտ 30,000 մարդ (նրանց ասացին, որ իրենք վտանգավոր են), որոնցից 20,000-ը ներկայացնում էին կրթական համակարգը, 14,000 մարդ զրկվեց քաղաքացիությունից, մոտ 30,000 մարդ փախավ երկրից, գրաքննության նկատառումներից ելնելով` արգելվեց 937 ֆիլմ, 400 լրագրողների համար առաջարկվեց 4000 տարվա բանտարկության մեղադրանք, 300 օրվա ընթացքում թերթերը չհրապարակեցին հետաքննության մասին նյութեր, ոչնչացվեց 37,000 տոննա թերթ ու հանդես:
1982 թվականի նոյեմբերի 7-ին Քենան Էվրենը 7-ամյա ժամկետով նշանակվեց Թուրքիայի 7-րդ նախագահ: