ՀՀ պաշտպանության փոխնախարար Դավիթ Տոնոյանը ռուսական РИА Новости գործակալությանը տված հարցազրույցում խոսել է տարածաշրջանում տիրող ռազմաքաղաքական իրավիճակի, հայկական զինված ուժերում տեխնիկական բարեփոխումների և ռազմական բնագավառում հայ-ռուսական համագործակցության մասին: Փոխնախարարը ասել է, որ իրենց նպատակն է ստեղծել ինքնատիպ ազգային պաշտպանական համակարգ` հաշվի առնելով Հարավային Կովկասի անվտանգության համակարգի առանձնահատկությունները, և ոչ թե կրկնօրինակել արդեն գոյություն ունեցող մոդելները: Նա նշել է, որ առայժմ իրենք չեն պատրաստվում միանգամից անցում կատարել բանակի համալրման պայմանագրային մեթոդին, սակայն առաջիկայում նախատեսում են պայմանագրային զինծառայողների թիվը հասցնել 35-40%-ի:
Խոսելով Ադրբեջանի հետ նոր պատերազմի հավանականության մասին՝ փոխնախարարն ասել է, որ ռազմական գործողությունները կարող են ցանկացած պահի վերսկսվել: Այս կապակցությամբ նա ավելացրել է, որ ՀՀ և Լեռնային Ղարաբաղի բանակների միջև համագործակցությունն ամենաբարձր մակարդակի վրա է:
Փոխնախարարը նաև անչափ բարձր է գնահետել հայ-ռուսական ռազմական համագործակցությունը` այն որակելով ոչ թե որպես գործընկերների, այլ դաշնակիցների հարաբերություն և հիշեցրել, որ հայկական բանակը զինված է բացարձակապես խորհրդային և ռուսական արտադրության ռազմական տեխնիկայով:
Տոնոյանը նշել է, որ 2010 թ. օգոստոսի 20-ին երկու երկրների միջև կնքված հուշագրի համաձայն՝ նախատեսվում է Հայաստանի տարածքում ստեղծել մի շարք ծառայողական կենտրոններ և ռազմական տեխնիկայի վերանորոգման համատեղ ձեռնարկություններ: Նախատեսվում է որ Հայաստանի որոշ ձեռնարկություններ կմտնեն ռուս-բելառուսական «Պաշտպանական համակարգեր» ֆինանսա-արդյունաբերական խմբի մեջ:
Անդրադառնալով սեպտեմբերի 21-ին Հայաստանում տեղի ունեցած զորահանդեսին` Տոնոյանը տեղեկացրել է, որ արդեն մի քանի տարի հայկական գիտահետազոտական ինստիտուտները և պաշտպանական արդյունաբերության համալիրի համակարգերը մշակում են տարբեր տիպի անօդաչու սարքեր, որոնց մեջ փոխնախարարն առանձնացրել է «Կռունկ-25»-ը: «Բոլոր անօդաչու սարքերը հաջողությամբ օգտագործվում են հետախուզական զորքերում, և մենք կարծում ենք, որ մեր մշակումները մրցունակ կլինեն միջազգային շուկայում»,- ասել է փոխնախարարը:
Գործակալության թղթակցի հարցին՝ արդյոք փոխվե՞լ է տարածաշրջանում ուժերի հավասարակշռությունը Ռուսաստանի կողմից Ադրբեջանին С-300 զենիթային հրթիռային համալիրի վաճառքից հետո, Տոնոյանը պատասխանել է, թե իրենք «դրանում ոչ մի խնդիր չեն տեսնում», և «դա նորմալ բիզնես-գործարք է»: Մանավանդ, C-300-ը ոչ թե հարձակողական, այլ պաշտպանական համակարգ է, իսկ Հայաստանը չունի այնպիսի միջոցներ, որոնց դեմ ուղղված լինի այդ զենքը:
Լրագրողի հայտնած այն տարակուսանքին, թե ինչպես է Հայաստանը հանդիսանում ՀԱՊԿ անդամ և միաժամանակ համագործակցում ՆԱՏՕ-ի հետ, Տոնոյանն արձագանքել է. «Վաղուց արդեն ակնհայտ է, որ և՛ Հավաքական անվտանգության պայմանագրի կազմակերպությունը, և՛ ՆԱՏՕ-ն անվտանգության խնդրի լուծման համար որդեգրել են սկզբունքորեն նման մոտեցումներ, իսկ սպառնալիքի գլոբալ ծավալը դուրս է մղվել երկրորդ պլան` ստիպելով կողմերին ավելի ընդլայնել համագործակցության շրջանակները: Հայաստանն այս առումով վարում է հավասարակշռված քաղաքականություն` հաշվի առնելով ինչպես սեփական, այնպես էլ իր գործընկերների և դաշնակիցների շահերը»: