Այսօր Երևանում կազմակերպվել էր մայրաքաղաքի գլխավոր հատակագծի ճշգրտման նախագծի հասարակական քննարկում, որը նախաձեռնել է Transparency Internation հակակոռուպցիոն կենտրոնը: Քննարկմանը մասնակցում էին ՀՀ տարբեր գերատեսչությունների, հասարակական ու միջազգային կազմակերպությունների ներկայցուցիչներ, անկախ փորձագետներ: ԹԻ կենտրոնի ղեկավար Սոնա Այվազյանը հայտնեց, որ քննարկմանը հրավիրված էր նաև Երևանի գլխավոր ճարտարապետ Նարեկ Սարգսյանը, ով, սակայն, «ավելի կարևոր միջոցառումներ ունենալու» պատճառաբանությամբ չի կարողացել մասնակցել: Փոխարենը՝ քննարկմանը ներկա էին քաղաքապետարանի ճարտարապետության և քաղաքաշինության ու տրանսպորտի վարչությունների պետերը:
«Երևաննախագիծ ինստիտուտ» ՓԲԸ-ի գործադիր տնօրեն Սիրեկան Օհանյանը լրագրողների հետ զրույցում նշեց, որ հատակագծում հաշվի են առնվել քաղաքի հողային ռեսուրսների, կանաչ տարածքների, տրանսպորտային երթուղիների փոփոխության հարցերը, ճանապարհափողոցային նոր սխեմաները և այլն:
«Մայրաքաղաքում էական շեղումներ չեն եղել, որոնք կոպիտ խախտումներ կարելի է համարել գլխավոր հատակագծից»,- հավաստեց Ս. Օհանյանը` հավելելով, որ Հրապարակի մետրոյի մոտ հյուրանոցի կառուցման խնդիրը դուրս է հատակագծի մշակման շրջանակներից:
Գլխավոր հատակագծի ճշգրտումները կատարվել են անցած 6 տարիների համար: Քննարկման արդյունքները կամփոփվեն և առաջարկները կներկայացվեն «Երևաննախագիծ» ինստիտուտին:
