Քաղցկեղի բուժման միակ միջոցը կանխարգելումն է: Այսօր լրագրողների հետ հանդիպման ժամանակ նշեց Հայ-ամերիկյան առողջության կենտրոնի գործադիր տնօրեն Խաչանուշ Հակոբյանը` կարևորելով նաև ճիշտ սննդակարգը և ապրելակերպը: «Պետք է սնվել ճիշտ, օրը կազմակերպել ճիշտ, առավոտյան լիցքային վարժություններ անել, ֆիզիկական ծանրաբեռնվածություն ունենալ, օրինակ` լողի: Նախընտրելի է ուտել բանջարեղեն, մրգեր, թարմ քամած հյութեր, ծովամթերք: Խորհուրդ չի տրվում միս ուտել, այն քաղցկեղով հիվանդ մարդկանց արգելվում է,ուստի պետք է չափավորել միսը: Պետք է շատ օգտագործել սոխ, սխտոր, կարմիր խաղող, կարմիր գինի, սև շոկոլադ և օրը չորս-հինգ անգամ սնվել»,- խորհուրդ տվեց Խ. Հակոբյանը:
Նա նաև տեղեկացրեց, որ քաղցկեղը կարող է ժառանգաբար փոխանցվել, բայց հիվանդության առիթ կարող են հանդիսանալ նաև հարվածները: «Եթե օրգանիզմում կա հակվածություն, պետք է խուսափել հարվածներից: Եթե հայտնաբերվում է չարորակ գոյացություն, եթե հայտնաբերվում է երրորդ կամ չորրորդ փուլում, օրգանիզմը կարող է պայքարել հիվանդության դեմ: Մենք պետք է առանց ախտանիշների նույնիսկ հետազոտվենք, մասնավորապես՝ միջին տարիքում, պետք է վաղ փուլում հայտնաբերել և միջոցներ ձեռք առնել»,- ասաց Խ. Հակոբյանը:
Համատեղ ասուլիսի ընթացքում նույն թեմայի շուրջ խոսեց նույն կենտրոնի տղամարդու առողջության բաժանմունքի վարիչ, բժշկական գիտությունների թեկնածու, դոցենտ Ռուբեն Հովհաննիսյանը` ընդգծելով, որ քաղցկեղը կարող է փոխանցվել տղամարդուց կնոջը, բայց պետք է ընդգծել, որ փոխանցվում է ռիսկի գործոնը և ոչ քաղցկեղը:
