Այս տարի լրանում է Վանաձորի՝ Հովհաննես Աբելյանի պետական դրամատիկական թատրոնի հիմանադրման 80-ամյակը: Այս կապակցությամբ Մշակույթի նախարարությունը նախաձեռնել է միջոցառումների ցանկ, բացի այդ, մասնակի վերանորոգվել է թատրոնի շենքը:
Սեպտեմբերի 18-ին Ս. Խալաթյանի «Հրադադար» պիեսով բացվել է թատերաշրջանը, իսկ սեպտեմբերի 26-ից Վանաձորում սկսվել է թատերական տասնօրյակը: Թատրոնի գեղարվեստական ղեկավար Վահե Շահվերդյանի խոսքերով`90-ականների սկզբին որևէ թատրոն Երևանում չուներ այդքան միջազգային ճանաչում, որքան աբելյանցիները Չեխովի «Երեք քույր» պիեսով ունեցան:
Հովհաննես Աբելյանի պետական դրամատիկական թատրոնի գեղարվեստական ղեկավար Վահե Շահվերդյանը թատրոնի մասին կարճ ակնարկ պատմեց, ըստ որի`թատրոնը ստեղծվել է 31 թվականին, Յանուվսկու «Ցասում» բեմադրությամբ (բեմադրիչ՝ Աշոտ Մաթևոսյան):
Թատրոնի առաջին 20-ամյակը կարևորվել է Հովհ. Աբելյանի, Վահրամ Փափազյանի, Հրաչյա Ներսիսյանի, Արուս Ոսկանյանի հյուրախաղերով: Հովհաննես Աբելյանը այդ տարիներին հանդես է եկել որպես ուսուցիչ այն դերասանների, ովքեր իրենց առաջին քայլերն էին անում: Հիմա թատրոնը դերասանական ստուդիա ունի: Վահե Շահվերդյանի խոսքերով` նախկինում թատրոնը հզոր է եղել իր դերասանական կազմով. «96-ից հետո, երբ ես եկա Երևան՝ ղեկավարելու այն թատրոնը, որի դռները կողպեքով փակված էին, ես չէի խզում իմ կապերը Վանաձորի հետ, բայց ամբողջությամբ չէի կարող ուշադրությունս կենտրոնացնել, հիմա, փառք Աստծո, այնտեղ եմ, և դերասանական խումբը միասնական ուժերով փորձում է հաղթահարել շատ հարցեր, իսկ Շեքսպիրի «Արքա Լիրը» մեծ ընդունելության է արժանացել»:
Այս պահին թատրոնի խաղացանկում ընդգրկված են շուրջ 19 ներկայացումներ: Այս տարի թատրոնը կընդլայնի իր խաղացանկը, մասնավորապես՝ կբեմադրվեն Շիլլերի «Խարդավանք և սեր», Սունդուկյանի «Պեպո», Շիրվանզադեի «Չար ոգի» պիեսները:
