Իրանական Asr Iran լրատվական կայքի հաղորդմամբ՝ իրանցի ազդեցիկ պահպանողական հոգևորական Հոջաթոլիսլամ Ջաֆար Շոջունին, Լիբանանի Daily Star օրաթերթի հետ ունեցած հարցազրույցում անդրադառնալով Ահմադինեժադի աջակիցների թվի նվազմանը, հայտարարել է. «Թեև Ահմադինեժադի աջակիցների թիվը խիստ նվազել է, բայց Իրանի իսլամական համակարգի վերնախավը համաձայնել է, որ Ահմադինեժադը մինչև իր նախագահության շրջանի ավարտը մնա իր պաշտոնում և ղեկավարի գործադիր իշխանությունը: Իհարկե, հակասությունը Ահմադինեժադի անձի պատճառով չէ, այլ՝ նրա շուրջը համախմբված դավադիրների, որոնց գլխավորում է նախագահի խնամին ու գրասենյակի ղեկավարը՝ Էսֆանյար Ռահիմ Մաշային»։
Հիշեցնենք, որ օրեր առաջ Իրանի խորհրդարանի մի շարք պատգամավորներ մի նախագիծ են շրջանառության մեջ դրել, որի համաձայն՝ Իրանում կվերացվի նախագահի պաշտոնը, և գործադիր իշխանությունը կգլխավորի խորհրդարանի կողմից ընտրված վարչապետը: Փորձագետների համոզմամբ, խորհրդարանի այդ քայլը պատասխան էր նախագահի ու նրա թիմակիցների կողմից երկրի առաջնորդի դեմ ծավալած գործողություններին:
