Իրանի, Մոնղոլիայի, Հնդկաստանի և Պակիստանի քաղաքների օդն ամենաաղտոտվածն է ողջ աշխարհում, քանի որ նրա մեջ փոշին մի քանի հարյուր անգամ գերազանցում է թույլատրելի նորմաները: Այս մասին ասվում է Առողջապահության համաշխարհային կազմակերպության զեկույցում:
Ուսումնասիրվել է աշխարհի 91 քաղաքի օդի պարունակությունը: Համաձայն այդ զեկույցի` ամենակեղտոտ օդ ունեցող քաղաք է համարվել իրանական Ահվազը, որին հետևում է Մոնղոլիայի մայրաքաղաք Ուլան Բատորը, իսկ եռյակը եզրափակում է մեկ այլ իրանական քաղաք` Սենենդեջը: «Լավագույն քսանյակում» տեղ են զբաղեցրել Պակիստանի և Հնդկաստանի քաղաքները: Աչքի է ընկել նաև Բոթսվանայի մայրաքաղաքը, որը 9-րդ հորիզոնականում է:
Ամենամաքուր օդ ունեցող քաղաքը կանադական Ուայթհորսն է: Առողջապահության համաշխարհային կազմակերպության բոլոր նորմերին համապատասխանող քաղաքները հիմնականում տեղակայված են Կանադայի և ԱՄՆ տարածքներում: ԱՀԿ զեկույցում նաև ասվում է, որ տարեկան 2 միլիոն մարդ է մահանում օդի աղտոտվածության պատճառով:
