Ադրբեջանական APA լրատվական գործակալության փոխանցմամբ՝ Ռուսաստանում Ադրբեջանի դեսպան Փոլադ Բյուլբյուլօղլին լրագրողներին հայտարարել է, թե այսօր Բաքվում «բնակվում» է 30,000 հայ, հետևաբար համատեղ ապրելը հնարավոր է.
«Հայաստանն Ադրբեջանի հարևանն է, Հայաստանում կա և՛ ժողովուրդ, և՛ ազգ։ Նրանց մեջ կան նաև ինտելիգենտ անձինք։ Բնականաբար, Ղարաբաղյան հակամարտությունը երբևէ ավարտվելու է, և մենք նորից համատեղ ապրելու ենք։ Այսօր Բաքվում «բնակվում» է 30,000 հայ, հետևաբար համատեղ ապրելը «հնարավոր» է։
Ադրբեջանական կողմն «ամեն ինչ անում» է Ղարաբաղյան հակամարտության խաղաղ կարգավորման համար։ Պետք է դա հասկացնել նաև հակառակ կողմին։ Պետք է հանդիպումներ կազմակերպել ստեղծագործ, ինտելիգենտ անձանց միջև, և մեր դիրքորոշման մասին բացատրել նրանց։ Դրա համար էլ, երբ մենք այցելում ենք Հայաստան, փորձում ենք հայ հասարակությանը հասցնել Ադրբեջանի դիրքորոշումը։ Մոտ ժամանակներս դեպի Հայաստան այդպիսի այցեր նախատեսված չեն»։
Հիշեցնենք, որ Բյուլբյուլօղլին Ռուսաստանում Ադրբեջանի դեսպան է նշանակվել 2006 թվականին։
