Նոյեմբերի լույս 30-ի գիշերն ուկրաինական անօդաչուները գրոհել են Դաղստանի ինքնավար հանրապետության Կասպիյս քաղաքը։ Այդ մասին թելեգրամյան գրառում է կատարել ինքնավարության ղեկավար Սերգեյ Մելիկովը։ «Նախնական տեղեկություններով՝ փորձ է արվել ԱԹՍ-ով գրոհել Կասպիյսկի օբյեկտները։ Այս պահի դրությամբ ավերածությունների և զոհերի մասին տեղեկություն չկա», – ՏԱՍՍ-ի փոխանցմամբ գրել է Մելիկովը։
Լրատվամիջոցն իր կողմից հավելել է, որ անվտանգության նկատառումներից ելնելով Մախաչկալայի օդանավակայանը ժամանակավորապես դադարեցրել է թռիչքներ սպասարկել։ Ըստ ՏԱՍՍի-ի՝ Ուկրաինայի զինված ուժերը «մշտապես փորձում են ԱԹՍ-ի միջոցով Դաղստանում օբյեկտներ գրոհել»։
Իրականում ի՞նչ է կատարվել Դաղստանի Կասպիյս քաղաքում՝ հայտնի չէ։ Թերևս, ավելի ուշ ուկրաինական կողմը որոշ տեղեկություններ կտարածի։ Բոլոր դեպքերում Դաղստանի ղեկավարի գրառումից կարելի է ենթադրել, որ ուկրաինական անօդաչուների գրոհը լիովին անհաջող չի եղել, այլապես նա վստահաբար կասեր, որ հարձակման հետևանքով ավերածություններ և զոհեր չկան։
Դաղստանի Կասպիյս քաղաքը ՌԴ Ռազմածովային ուժերի Կասպից նավատորմիղի գլխավոր հենակայանն է՝ հրամանատարական կետով և կառավարման ու կապի կենտրոնով հանդերձ։ Նախկինում Կասպից նավատորմիղի հենակայանը գտնվել է Աստրախանում։ Կասպիյսկ տեղափոխվելու որոշումն ընդունվել է մի քանի տարի առաջ։ Այդ առթիվ ադրբեջանցի ռազմական փորձագետները տագնապ են հայտնել, երբ հայտնի է դարձել, որ Ռուսաստանը Սիրիայի ուղղությամբ «Կալիբր» հրթիռներ է արձակում Կասպիյսկից։
Վերջին շրջանում տեղեկություն է տարածվել, որ ՌԴ ՌԾՈՒ Սեւծովյան նավատորմի մի քանի ռազմանավեր վերաբազավորվել են Կասպիյսկում, որպեսզի ապահովագրվեն ուկրաինական հարձակումներից։ Երևում է, Կասպիյսկը նույնպես կատարյալ ապահովություն չի երաշխավորում։
Ուշագրավ է մամուլի տեղեկությունը, որ Ուկրաիանայի Դնեպր քաղաքում «Յուժմաշ» արտադրական միավորումը խոցած «Օրեշնիկ» հրթիռներն արձակվել են Աստրախանի մարզից, ամենայն հավանականությամբ՝ «Կապուստին Յար» փորձակայանից։ Եթե Ուկրաինան նոյեմբերի լույս 30-ի գիշերը «վրեժխնդրության ակցիա» է իրականացրել, ապա ինչու՞ թիրախավորել է Կասպիյսկը, ոչ թե՝ Աստրախանը կամ հենց «Կապուստին Յար» փորձակայանը։
Կասպիյսկը գտնվում է Դաղստանի հարավում, սահմանակից է Ադրբեջանին։ Սեպտեմբերին ՌԴ ՌԾՈՒ Կասպից նավատորմիղի երկու ռազմանավ «հարգանքի այց է կատարել» Բաքու։ Բոլորովին վերջերս Ադրբեջանի և Իրանի ռազմա-ծովային ուժերը համատեղ զորավարժություն են անցկացրել։ Անցած շաբաթ Ռուսաստանի նախագահի օգնական, ԱԽ նախկին քարտուղար Պատրուշեւը, որ գլխավորում է ՌԴ Ծովային կոլեգիան, Աստրախանում խորհրդակցություն է անցկացրել, որի ընթացքում շոշափվել է Կասպից ավազանում անվտանգության ընդհանուր հայեցակարգ ունենալու հարցը։
Եթե ուկրաինական անօդաչուները «հասել են» Կասպիյսկ, ուրեմն ռուս-ուկրաինական պատերազմի ռազմավարական դիմակայության գիծը հասնում է Ադրբեջանի հյուսիսային սահմաններին։ Ռուսաստանի համար բարդ սցենարի դեպքում կարող է ծագել ռազմանավերն ավելի հարավ՝ Ադրբեջանի ջրային տարածք, տեղափոխելու, վերաբազավորվելու կամ Կասպից ավազանի ադրբեջանական հատվածից Ուկրաինայի դեմ բալիստիկ հրթիռներ կիրառելու անհրաժեշտություն։
Թուրքիայի արտաքին գործերի նախարար Ֆիդանն ասել է, որ ռուս-ուկրաինական պատերազմում տեխնոլոգիական բոլոր նորությունները գործի են դրվել։ Վլադիմիր Պուտինի ներկայացմամբ՝ Ռուսաստանի զինանոցում կան ոչ միջուկային սպառազինություններ, որ դեռևս չեն կիրառվել։ Նման հրթիռներ Կասպիյսկում կա՞ն, Ուկրաինան թիրախներ խոցե՞լ է։ Ադրբեջանի ջրային սահմանից մի քանի տասնյակ կիլոմետր հեռավորության վրա ծավալվող «դրաման» ի՞նչ ազդեցություն է թողնում Իլհամ Ալիևի վրա։ Եթե նա տրվի Պուտինի փորձությանը, Ուկրաինան Բաքվի ծովախորշը կթիրախավորի՞։ BP-ն կարտոնի՞։
