Եվրոպայի երկրների խորհրդարանների արտաքին հանձնաժողովի նախագահները, պատգամավորներն ու խորհրդարանականները համատեղ հայտարարություն են տարածել Վրաստանի վերաբերյալ․ հաղորդում է «Ինտերպրեսնյուսը»: Հայտարարության մեջ ստորագրողներն ափսոսանք են հայտնում «վերջին շրջանում ժողովրդավարությունից Վրաստանի հետընթացի կապակցությամբ»:
Փաստաթղթում խոսքը վերաբերում է Վրաստանում հոկտեմբերի 26-ին կայացած խորհրդարանական ընտրություններին․ մտահոգություն է հայտնվել, որ ընտրություններն անցել են «աննախադեպ թվով միջադեպերի և համակարգված խախտումների պայմաններում»: Ընդգծվում է անկախ միջազգային հետաքննության անհրաժեշտությունը․
«Մեր տրամադրության տակ գտնվող մեղադրանքներն այնքան լուրջ են, որ միայն միջազգային անկախ հետաքննությունը կարող է հետաքննել արձանագրված բոլոր խախտումները:
Պետք է ետ կանչվի օրենսդրությունը, որը խաթարում է քաղաքացիների և կազմակերպությունների հիմնարար ազատությունները և հակասում է այն սկզբունքներին, որոնց վրա հիմնված է Եվրամիությունը», – ասված է հայտարարության մեջ:
Ստորագրողները կոչ են անում Եվրամիությանը պատժամիջոցներ սահմանել վրացի պաշտոնյաների, այդ թվում Բիձինա Իվանիշվիլիի դեմ, «ովքեր պատասխանատվություն են կրում ընտրական գործընթացի խախտումների համար»:
