Երեկ, առավոտյան, ժամը 10.00-ի սահմաններում, «Առաջին լրատվականին» հայտնի դարձավ, որ Մյասնիկյանի պողոտայում վաղ առավոտից երթևեկությունը փակ է: Պատճառը ոստիկանական տարբեր ստորաբաժանումների` տարբեր ուղղություններով իրականացվող` հանցագործների վնասազերծման գործողություններն էին: Նախնական տվյալներով, առնվազն երեք հանցագործ էր վնասազերծվել: Հետապնդվողների Mercedes մակնիշի, 60 ՕՕ 086 պետհամարանիշի ավտոմեքենան ենթարկվել էր վթարի, իսկ դրանում գտնվողներից մեկը փորձել էր դիմել փախուստի: Նա բարձրացել էր մոտակա ժայռը, այնտեղից` վայր ընկել ու մահացել: Եվս մեկ հետապնդվողի հաջողվել էր ձերբակալել:
«Առաջին լրատվականի»` ոստիկանությանը մոտ կանգնած աղբյուրը տեղեկացրել էր, որ հանցագործները կապ ունեն վերջին շրջանի ամենաաղմկահարույց ավազակային հարձակումների հետ, որոնք կատարվել են բարձրաստիճան պաշտոնյաների բնակարաններում, որոնցից վերջինը պատահել էր ԱԺ նախկին պատգամավոր Նապոլեոն Ազիզյանի բնակարանում:
Ավելի ուշ` ժամը 16.00-ին, հայտնի դարձավ, որ «հանցախմբի» մահացած անդամը Գուրգեն Հայրապետյանն է` «Եթում» մականունով: Վերջինս Ռուսաստանում կատարած ավազակային հարձակման համար ազատազրկման էր դատապարտվել 9 տարով և պատիժը կրում էր Հայաստանում: Նա անցյալ տարի վաղաժամկետ պայմանականով ազատ էր արձակվել «Էրեբունի» քրեակատարողական հիմնարկից: Գրեթե միաժամանակ մեր թերթին հայտնի դարձավ, որ արդեն կա 9 ձերբակալված, որոնց թվում է «Ցուլ» մականվամբ մեկը, ով նախկինում դատապարտված է եղել:
Աշխատանքային օրվա վերջում ՀՀ ոստիկանությունը տարածեց հետևյալ հաղորդագրությունը. «Երևան քաղաքում վերջին շրջանում տեղի ունեցած ավազակային հարձակումների դեպքերի առթիվ ՀՀ ոստիկանության քննչական գլխավոր վարչության վարույթում քննվող քրեական գործի նախաքննության շրջանակներում իրականացված օպերատիվ-որոնողական և քննչական գործողությունների արդյունքում ՀՀ ոստիկանության քրեական հետախուզության գլխավոր վարչությունը, ոստիկանության կազմակերպված հանցագործությունների դեմ պայքարի վարչությունը և Երևան քաղաքի վարչությունը 2011 թվականի սեպտեմբերի 23-ի վաղ առավոտյան վնասազերծել են հանցավոր կայուն մի խումբ, որը կասկածվում է մայրաքաղաքում իրականացված ծանր հանցագործություններ կատարելու մեջ: Հանցավոր խումբը ծրագրում էր իրականացնել նոր հանցագործություն, ինչը ձախողվել է ոստիկանության ձեռնարկած միջոցառումների արդյունքում: Հանցավոր խմբի անդամները ոստիկանության աշխատակիցներին ցուցաբերել են զինված դիմադրություն, ինչը հաջողվել է կանխել, և հանցավոր խումբը վնասազերծվել է: Հայտնաբերվել և առգրավվել է մեծ քանակությամբ զենք և զինամթերք, հանցագործության գործիքներ:
Դեպքի առթիվ հարուցվել է քրեական գործ` ՀՀ քրեական օրենսգրքի 316-րդ հոդվածի 2-րդ մասով և 235-րդ հոդվածի հատկանիշներով: Բերման է ենթարկվել 13 անձ: Ոստիկաններին դիմադրություն ցույց տված և փախուստի դիմած անձանցից մեկը մահացել է: Ձեռնարկված միջոցառումների արդյունքում պարզվել է տվյալ անձի ինքնությունը: Կատարվում է նախաքննություն` պարզելու բերման ենթարկված անձանց մեղսակցությունն ու դերակատարության աստիճանը մայրաքաղաքում տեղի ունեցած ծանր հանցագործություններին:
Ինտերնետային լրատվամիջոցների հրապարակումները, թե որպես հանցավոր խմբի անդամ բերման ենթարկվածների թվում են տարբեր բարձրաստիճան պաշտոնատար անձանց որդիներ` իրականությանը չի համապատասխանում»:
Սակայն ՀՀ գլխավոր դատախազությունից տեղեկություն տարածվեց այն մասին, որով մասամբ հաստատվեց «Առաջին լրատվականի» տարածած տեղեկությունը. ՀՔԾ պետի տեղակալի որդին կասկածվում է «հանցախմբի» հետ կապ ունենալու մեջ: ՀՀ հատուկ քննչական ծառայության պետի տեղակալ` Մարսել Մաթևոսյանի որդին մի շարք անձանց հետ բերման է ենթարկվել Երևանի պետական համալսարանի մոտակայքից` մի շարք մեքենաների պատկանելությունը ճշտելու ուղղությամբ իրականացվող միջոցառումների շրջանակներում:
