Ռուսական Regnum լրատվական գործակալության փոխանցմամբ՝ պաշտոնական Թբիլիսին իր բողոքն է հայտնել սեպտեմբերի 22-ին Ռուսաստանի Պետդումայի կողմից Աբխազիայում ու Հարավային Օսիայում միացյալ ռազմաբազաների ստեղծման փաստաթղթի վավերացման կապակցությամբ.
«Ռուսաստանի վտանգավոր գործողությունները սպառնում են ոչ միայն Կովկասյան տարածաշրջանի, այլև՝ Սևծովյան հատվածի, Կասպիցի ու ողջ Եվրոպայի կայունությանն ու անվտանգությանը։ Ռուսաստանն այդ ապօրինի ու անպատասխանատու գործողությամբ փորձում է առանց Վրաստանի կառավարության համաձայնության իրականացնել ինքնիշխան երկրի տարածքում սեփական ռազմաբազաների տեղակայման օրինականացումը, շարունակում է ուժեղացված տեմպերով Վրաստանի օկուպացված տարածքների ռազմականացումը, ինչը հակասում է Եվրոպայում սովորական սպառազինության մասին պայմանագրով հաստատված պահանջներին։
Վրաստանը քննադատում է Ռուսաստանի այդ գործողությունները և դիմում է միջազգային հանրությանը՝ կոչ անելով ազդել Ռուսաստանի վրա ու հարկադրել նրան իրագործել միջազգային պայմանագրերով ստանձնած պարտավորությունները և անհապաղ ձեռնարկել Վրաստանի տարածքների ապաօկուպացման գործընթացը»։
