CNN Türk-ի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցությունը (PKK) ներողություն է խնդրել Սիիրթում (Սղերթ) իրականացրած իր գործողության համար։
Միջադեպը տեղի է ունեցել երեքշբաթի օրը, երբ PKK զինյալները Սիիրթի կենտրոնում ձեռքի նռնակ նետեցին և երկարափող զենքերով գնդակոծեցին Ոստիկանական ակադեմիայի շենքի առջև կանգնած ավտոմեքենան, որում նրանց ենթադրությամբ գտնվել են ոստիկաններ։ Արդյունքում, PKK-ն սխալմամբ սպանել էր 4 երիտասարդ կնոջ և ծանր վիրավորել 2-ին։
Այժմ PKK-ն ներողություն է խնդրել այդ կապակցությամբ։
Հիշեցնենք, որ Թուրքիայի վարչապետ Էրդողանը Նյու Յորքում տեղի ունեցած հանդիպման ժամանակ Սիիրթի միջադեպի մասին իրազեկել էր ԱՄՆ նախագահ Բարաք Օբամային՝ խնդրելով Թուրքիային տրամադրել Predator տիպի անօդաչու թռչող սարքեր՝ PKK դեմ պայքարի համար։
