Բարսելոնայի «Սուրբ ընտանիքի» (Սագրադա ֆամիլիա) տաճարի շինարարությունը կարող է ավարտվել 2026 կամ 2028 թվականին՝ նրա շինարարությունը սկսելուց ավելի քան 140 տարի հետո: Այս մասին գրում է The Guardian-ը: Կոմիտեի նախագահ Խոան Ռիգոլը, որին հանձնարարվել է իրականացնել տաճարի երեսպատումը, պատմել է, որ տաճարը վերջնական տեսքի է բերվելու նրա ճարտարապետ Անտոնիո Գաուդիի մահվան 100-ամյակին կամ դրանից երկու տարի հետո:
«Մեր նպատակն այն է, որ կառուցենք 6 կենտրոնական աշտարակները, որոնցից 5-ի շինարարությունն արդեն սկսվել է»,- ասել է Ռիգոլը: Գլխավոր ճարտարապետն ասել է, որ ավարտի որևէ ժամկետ չի կարող հայտնել: «Ես չեմ ասում, որ դա ճիշտ չէ (որ ավարտվելու է 2026 թ..- 1in.am), ես հույս ունեմ, որ այդպես կլինի, սակայն դա հեշտ չէ: Շատ դժվար գործ է և նախապատրաստության կարիք ունի»,- ասել է Ջորդի Բոնետը:
«Ամեն ոք էլ հույս ունի, որ ամեն ինչ լավ է ավարտվելու, սակայն ես որևէ երաշխիք չեմ կարող տալ»,- ավելացրել է նա: Տաճարի կառուցումը, որը կատարվում էր բարեգործություններից ստացված գումարների հաշվին, սկսվել է դեռևս Գաուդիի ժամանակ: «Իմ հաճախորդը շտապելու տեղ չունի»,- մի անգամ ասել է Գաուդին՝ դիմելով Աստծուն:
Ինչպես գրում է թերթը՝ կոմիտեն տարեկան 500 հազար եվրո է ստանում տաճարի կառուցման համար արված հանգանակություններից:
