Հայաստանի ոսկերչությունը կաղում է: Երևանում Հայ ոսկերիչների համաշխարհային միության (AJA) կազմակերպած ցուցահանդեսում ներկայացված են տեղական արտադրության այնպիսի նմուշներ, որոնք համաշխարհային զարգացումներից ետ են առնվազն 50 տարով: Ընդ որում՝ հայ ոսկերիչները գոհ են իրենց արտադրանքից, որը հաջողությամբ իրացնում են Միջին Ասիայի երկրներում:
Կանադայի ոսկերիչների միության նախկին նախագահ, ներկայում AJA-ի ներկայացուցիչ Պիեռ Աքելյանը հայտնեց, որ առաջին անգամ Հայաստանում եղել է 14 տարի առաջ: Այն ժամանակ ոլորտի տեղական արտադրությունը խղճալի վիճակում էր: Պ.Աքելյանի գնահատմամբ՝ հայ ոսկերիչները տաղանդավոր են, բայց միայն տաղանդը բավական չէ միջազգային շուկայում մրցունակ լինելու համար. «Հարկավոր է ժամանակակից դիզայնին ծանոթ լինել: Մինչդեռ այդ առումով հայ ոսկերիչները շատ բան ունեն սովորելու»: Պ.Աքելյանը նշեց, որ ներկայում ՀՀ-ում արտադրությունը լավացել է, թեև կան նաև հին ավանդույթներով առաջնորդվողներ:
Հայաստանում բիզնես ծավալելու համար, ըստ Պ.Աքելյանի, հիմնական խոչընդոտը հարկային և մաքսային օրենքներն են, որոնք շատ են դժվարացնում ապրանք ներկրելու և արտահանելու գործընթացները. «Շուկան միայն Հայաստանը չէ, և ոչ էլ նախկին ԽՍՀՄ երկրները»:
AJA-ի ԱՄՆ ներկայացուցչության անդամ Սարգիս Նուրյանի խոսքով՝ սփյուռքահայ գործարարների պատկանող բազմաթիվ ոսկերչական ընկերություններ մեծ հաջողություններ ունեն ամբողջ աշխարհում, մասնավորապես՝ ԱՄՆ-ում, ԱՄԷ-ում, Լիբանանում և այլ երկրներում հայտնի բրենդներ են: Նա նշեց, որ վաղուց ցանկանում է բիզնես ծավալել նաև հայրենիքում, իր արտադրանքը ներկայացնել տեղական շուկայում, սակայն առկա օրենսդրական դաշտը թույլ չի տալիս շահույթ ապահովել:
Սփյուռքահայ ոսկերիչները հայտնեցին, որ սպասում են Հայաստանում ազատ տնտեսական գոտիների ձևավորմանը, ինչի արդյունքում շատ խնդիրներ կլուծվեն և ներդրումներ կատարելը արդարացված կլինի:
