ԱՄՆ ՄԶԳ-ն ավարտում է Հայաստանում իրականացվող իր քառամյա Հակակոռուպցիոն գործողության մոբիլիզացման ծրագիրը: Դրա ղեկավար Ֆրանսուա Վիզինեն այսօր ասուլիսում ներկայացրեց ծրագրի շրջանակներում իրականացված գործողությունները` երկրում 11 Շահերի պաշտպանության և աջակցության կենտրոնների (ՇՊԱԿ) հիմնում, ՀՀ կառավարության և քաղաքացիական հասարակության հակակոռուպցիոն գործողություններին աջակցություն, կոռուպցիայի մասին հասարակության իրազեկման բարձրացում:
«Մենք համոզված ենք, որ մեր ծրագիրը լուրջ հիմքեր դրեց կառավարության և ՀԿ-ների` գալիք հազարամյակում գործողություններ իրականացնելու համար: Այն, որ ՇՊԱԿ-երը համաձայնագրեր ստորագրեցին քաղաքապետարանների, մարզպետարանների և այլ պետական կառույցների հետ, և սա խոսում է այն մասին, որ հասարակությունը պատրաստ է պայքարել կոռուպցիայի դեմ: Այս պահի դրությամբ հասարակությունն ավելի լավ պատկերացում ունի կոռուպցիայի մասին, հասկանում է, որ այն վատ է, և չի կարելի այն հանդուրժել»,- ասաց Ֆ. Վիզինեն:
ԱՄՆ ՄԶԳ հայաստանյան առաքելության ժողովրդավարության հարցերով գրասենյակի ղեկավար Սթիվեն Բրեյգերը հայտարարեց, որ ծրագրի իրականացման համար հատկացվել է 10 մլն դոլար. «ՇՊԱԿ-երն այն ամենամեծ ժառանգությունն է, որ թողնում է ծրագիրը»: Նա տեղեկացրեց, որ ԱՄՆ ՄԶԳ-ն որոշել է շարունակել աջակցությունը և Երիտասարդ իրավաբանների ասոցիացիայի միջոցով ՇՊԱԿ-երին ՀՀ 10 մարզերում մեկ տարվա ընթացքում կտրամադրվի մոտ 600 հազար դոլար դրամաշնորհ:
«Միակ ամենակոռումպացված ոլորտ չունենք, բայց կարող ենք ասել, որ ստացված բողոքների մեծ մասը վերաբերում է սեփականության իրավունքին»,- նշեց Ս. Բրեյգերը` հավելելով, որ գոհ են կատարված աշխատանքից, բայց հակակոռուպցիոն ոլորտում աշխատելը հիասթափություն կարող է առաջացնել, քանի որ բախվում են շատ շահեր: Թե ինչքան ժամանակում քաղաքացինեը կզգան փոփոխություն, կախված է կառավարության, քաղաքացիական հասարկության ջանքերից` որքանով քաղաքացիները տեր կկանգնեն իրենց իրավունքներին, ԶԼՄ-ներից: Ըստ Ս. Բրեյգերի` այս գործոններից ոչ բոլորն են առկա Հայաստանում, և փոփոխության համար լուրջ ջանքեր կպահանջվեն:
