ԱՄՆ-ը մատի մի շարժումով կարող էր կանգնեցնել Ուկրաինային, առանց նրա համաձայնության դա չէր լինի,- Կուրսկի մարզ ուկրաինական ներթափանցման մասին ասել է Վաշինգտոնում ՌԴ դեսպան Անտոնովը: Նա այդ հարցում ռուս-ամերիկյան շփումները բացառել է: «Ամերիկացիները չպիտի որոշեն, թե Ռուսաստանն ինչպես է պահպանում իր սահմանները»,- հայտարարել է Անտոնովը եւ վստահեցրել, որ նախագահ Պուտինը «որոշում կայացրել է, ովքեր մեղավոր են, ամենախիստ պատիժը կստանան»:
Ի՞նչ որոշում է ընդունել Ռուսաստանի նախագահը՝ դեսպանի խոսքից հստակ չի հասկացվում, բայց տպավորություն է, որ նա շեշտը դնում է Ուկրաինայի դեմ պատժիչ գործողությունների անխուսափելիության վրա եւ հասկացնում, որ ռուս-ուկրաինական պատերազմի հարցում Մոսկվայի եւ Վաշինգտոնի միջեւ «դիվանագիտական բուֆեր այլեւս չկա»։
Վաշինգտոնում ՌԴ դեսպանի այս հայտարարությունը հաջորդել է Պենտագոնի մամուլի քարտուղարի տեղակալ Սաբրինա Սինգհի դիտարկմանը, ըստ որի, թեեւ Ուկրաինան ասել է, որ Կուրսկի մարզ ներխուժման նպատակը «բուֆերային գոտու ստեղծումն է», մի շարք հարցեր դեռեւս պարզ չեն։ Պենտագոնը, կարծես, ընդունել է, որ Կիեւի այդ հարձակմանը տեղեկացված է, բայց Ուկրաինայի մտադրության շուրջ վերապահումներ ունի։
Դեսպան Անտոնովը բացահայտել է, որ Մոսկվան Կուրսկի մարզից ուկրաինական զորքերի հեռացման այլ տարբերակ, քան «լիակատար ջախջախումը», չի նախատեսում։ ՌԴ արտաքին գործերի նախարար Լավրովը միանշանակորեն բացառել է բանակցությունների հնարավորությունը։ Հետեւում է, որ Ռուսաստանը շարունակելու է պատերազմը։
Ավելի վաղ, ելնելով հանգամանքից, որ Ռուսաստանի եւ ԱՄՆ ռազմական գերատեսչությունների եւ հատուկ ծառայությունների միջեւ «խորհրդապահական շփումների խողովակ» կա, միջազգային փորձագիտական շրջանակները Մոսկվա-Վաշինգտոն «սկզբունքային համաձայնությունը հնարավոր» էին տեսնում։
Ուկրաինայի հարցով ԱՄՆ-ի հետ քննարկումների բացառումը դեսպան Անտոնովը հնչեցրել է Կիեւ Հնդկաստանի վարչապետ Մոդիի այցին ընդառաջ։ Հնդկաստանի վարչապետը Վարշավայում ասել է, որ Ուկրաինայի նախագահին պատերազմը դադարեցնելու առաջարկություն ունի։ Ըստ երեւույթին, Մոսկվան նաեւ նրան է դիվանագիտական ազդակ հղում, որպեսզի Զելենսկիի հետ հանդիպմանը որեւէ նախաձեռնության մասին չհայտարարի։
Դրանից չի հետեւում, թե Մոսկվան Նյու-Դելիին խնդրում է առհասարակ ուկրաինական կարգավորման մասին չխոսել։ Աննապատակահարմար է ժամանակը, իրավիճակը, քանի որ ուկրաինական զորախումբը շարունակում է մնալ Կուրսկի մարզում։ Բայց հարց է՝ եթե Ռուսաստանին հաջողվի «գլխովին ջախջախել» այդ զորախումբը, Մոսկվան հրադադարի ի՞նչ պայմաններ կառաջարկի կամ առհասարակ կառաջարկի՞, թե ավելի կծավալի հարձակումը՝ նպատակ դնելով գրավել Կիեւը եւ անվերապահ կապիտուլյացիայի պահանջ կդնի։
Անվտանգության եւ արտաքին քաղաքականության հարցերով Եվրամիության հանձնակատար Բորելը խոսել է Ուկրաինային տրամադրված սպառազինությունների կիրառման արգելքները «վերանայելու անհրաժեշտությունից»։ Դա նշանակում է ռուս-ուկրաինական պատերազմի թատերաբեմի ընդլայնում եւ բնույթի փոփոխություն։
Որոշ վերլուծաբաններ գրեթե համոզված են, որ եթե Ռուսաստանին խորքային հարվածներ հասցվեն, Պուտինը «կթիրախավորի Կիեւի պետական կառույցները» կամ «տակտիկական միջուկային զենք կկիրառի»։ Ռուսաստանյան «Նեզավիսիմայա գազետան» հիշեցրել է, որ լրացել է Մոսկվայում պետական հեղաշրջման փորձի 33-րդ տարին։ Դա բավական խորհրդանշական հիշեցում է։
