Թուրքական Cihan գործակալության փոխանցմամբ՝ թուրքական 3 ռազմանավ շարժվում է Կիպրոսի ուղղությամբ: Նավերն արդեն անցել են Դարդանելը և մտել Էգեյան ծով:
Թուրքիայի զինված ուժերի գլխավոր շտաբի պետ Նեչդեթ Օզելը հայտարարել է, որ Կիպրոսի հյուսիսային հատվածում թուրքերը կսկսեն բնական ռեսուրսների շահագորմանն ուղղված աշխատանքներ: Համանման որոշում սեպտեմբերի 19-ին կայացրել էին Կիպրոսի իշխանությունները:
Թուրքական լրատվամիջոցները հայտնում են, որ եթե Կիպրոսի հույները փորձեն սրել իրավիճակը տարածաշրջանում, ապա դա նրանց կողմից իսկական արկածախնդրություն կլինի:
Հիշեցնենք, որ Կիպոսը 1974 թվականից բաժանված է երկու մասի, կղզու հյուսիսային հատվածը գտնվում է թուրքական ինքնահռչակ հանրապետության հսկողության տակ, սակայն միջազգային հանրությունն այդ պետության անկախությունը չի ճանաչում:
Թուրք-իսրայելական հարաբերությունների վատթարացման արդյունքում Թուրքիան հայտարարել էր, որ առանց իր մասնակցության թույլ չի տա շահագործել Միջերկրական ծովի արևելյան հատվածի բնական հարստությունները: Նախկինում Կիպրոսն ու Իսրայելը համաձայնություն էին ձեռք բերել Կիպրոսի մերձակա տարածքում գազ արդյունահանելու մասին:
