Դավիթաշեն համայնքի կրպակների ապամոնտաժումը հետաձգվել է մինչ դեկտեմբեր: Այս մասին «Առաջին լրատվականի» հետ զրույցում տեղեկացրեց Դավիթաշենի 4-րդ թաղամասի կրպակատեր Ծովինար Ավետիսյանը, ով մի շարք կրպակատերերի հետ օրեր առաջ դիմել էր համայնքի թաղապետարան և նման պատասխան ստացել:
«Մենք բողոքի մեծ ակցիա կազմակերպեցինք թաղապետարանի շենքի առջև, և մեզ ասացին, որ հետաձգվել է ապամոնտաժումը, նաև ասացին, որ ապամոնտաժման պատճառները չեն կարող ներկայացնել, քանի որ քաղաքապետարանից բանավոր հանձնարարական են ստացել միայն»,- տեղեկացրեց կրպակատերն` ասելով, որ դիմել է նաև ՄԻՊ-ի գրասենյակ, որտեղ խոստացել են օգնել, երբ ներկայացնի անհրաժեշտ բոլոր փաստաթղթերը:
Նշենք, որ Ծովինարի կրպակը սեփականաշնորհված է, բայց հողի վարձակալական պայմանագրի ժամկետը լրացել է: Նրա հավաստիացմամբ` երեք անգամ դիմել է քաղաքապետարան, բայց մերժում է ստացել: Վերջին անգամ գրավոր պատասխան էր եղել, որ արդիականացման փուլում է, աշխատանքներն ավարտելուց հետո կպատասխանեն, բայց այդ փուլը երբ է ավարտվելու՝ Ծովինարը չգիտի:
«Մեր կրպակը ոչ կանաչ գոտում է, ոչ մայթի վրա, որևէ խանգարող տեղում չէ, բայց մենք ասել ենք, որ մինչև գրավոր որոշում ցույց չտան, թույլ չենք տալու ապամոնտաժել»,- ասաց կրպակատերն`ընդգծելով, որ միայնակ մայր է, եղբայրը գամված է անվասայլակին: Նա պայքարելու է մինչև վերջ, սակայն լիահույս չէ, որ արդյունքի կհասնի:
