Ադրբեջանական Turan լրատվական գործակալության փոխանցմամբ՝ Ադրբեջանի արտգործնախարար Էլմար Մամեդյարովը, ով ՄԱԿ-ի Գլխավոր ասամբլեայի 66-րդ նիստի աշխատանքներին մասնակցելու նպատակով գտնվում է Նյու Յորքում, հանդիպել է իր ուրուգվայցի գործընկեր Լուիս Ալմագրոյի հետ։
Ադրբեջանի ԱԳՆ-ի մամլո ծառայությունը հայտնել է, որ հանդիպման ժամանակ կողմերը քննարկել են երկկողմանի հարաբերությունների ներկայիս իրավիճակը և հեռանկարները։ Բացի այդ, քննարկվել է նաև Հարավային Կովկասում տիրող իրավիճակը, այդ թվում նաև ղարաբաղյան հակամարտության կարգավորման հարցը։
Դրա հետ կապված՝ Ալմագրոն հայտարարել է, որ իր երկիրը մեծ կարևորություն է տալիս միջազգային իրավունքի սկզբունքներին և կողմնակից է, որ ղարաբաղյան հակամարտությունը կարգավորվի այդ սկզբունքներին համապատասխան։
Հիշեցնենք, որ օրեր առաջ Ուրուգվայի արտգործնախարար Լուիս Ալմագրոն հայտարարել էր, որ իր համոզվածությամբ Լեռնային Ղարաբաղը Հայաստանի պատմական մաս է կազմում, և նա պետք է լինի անկախ կամ կարճ ժամանակում կցվի Հայաստանին՝ ընդգծելով, որ դա է ղարաբաղյան հիմնախնդրի կարգավորման միակ տարբերակը։
