ԱՄՆ-ի նախագահ Բարաք Օբաման և Գերմանիայի կանցլեր Անգելա Մերկելը հեռախոսազրույց են ունեցել։ Այս մասին հաղորդում է Associated Press գործակալությունը: Օբաման և Մերկելը քննարկել են Եվրոպայի տնտեսական ճգնաժամի հետ կապված խնդիրները: Երկու առաջնորդն էլ եկել են միասնական եզրակացության՝ կարճ ժամանակահատվածում գտնել մի «դեղատոմս», որը թույլ կտա կանգնեցնել ճգնաժամը և խթանել աշխարհում տնտեսության աճը:
Բացի այդ, Մերձավոր Արևելքի հարցի քննարկման համատեքստում Բարաք Օբաման շնորհակալություն է հայտնել ԳԴՀ կանցլերին պաղեստինա-իսրայելական հարցում ամուր դիրքերի պահպանման համար:
Երկու առաջնորդների երկխոսությունը տեղի է ունեցել ՄԱԿ Գլխավոր ասամբլեայում տեղի ունենալիք քննարկումից առաջ, որտեղ Պաղեստինի ազգային ինքնավարության ղեկավար Մահմուդ Աբբասը պլանավորել է ելույթ ունենալ, որից հետո պետք է ՄԱԿ գլխավոր քարտուղար Բան Կի Մունին կազմակերպությանն անդամակցելու հայտ ներկայացնի:
