Грузия Online-ի փոխանցմամբ՝ սեպտեմբերի 22-ին Թբիլիսիում տեղի կունենա Վրաստանի և ԵՄ-ի միջև համագործակցության կոմիտեի երկրորդ նիստը։ Այս մասին հայտարարել է Վրաստանի փոխարտգործնախարար Նինո Կալանդաձեն։
Վերջինիս խոսքերով՝ այդ նիստը տեղի է ունենում երկու տարին մեկ. «Նիստի շրջանակներում ուշադրություն է հատկացվելու ԵՄ-ի հարևանության քաղաքականությանը, ինչպես նաև Արևելյան գործընկերություն նախաձեռնությանը։ Քննարկվելու է նաև ազատ առևտրի մասին ԵՄ-ի հետ բանակցությունների ընթացքը»։
Հիշեցնենք, որ օրեր առաջ Լեհաստանում տեղի ունեցած՝ ԵՄ անդամ երկրների արտգործնախարարների ոչ պաշտոնական գագաթնաժողովի մասնակիցներն աջակցել են Վրաստանի և Մոլդովայի հետ ազատ առևտրի գոտու ձևավորման շուրջ բանակցություններ սկսելու նախաձեռնությանը։
Խոսքն այնպիսի գոտու մասին է, որը ստեղծվում է ԵՄ-ի և Ուկրաինայի միջև։ Ենթադրվում է, որ ԵՄ-ի և Ուկրաինայի միջև ազատ առևտրային գոտու ձևավորման մասին համաձայնագիրը ստորագրվելու է այս տարեվերջին։