ԱՄՆ Կոնգրեսի ստորին պալատում Հանրապետական կուսակցության ղեկավար Ջոն Բոեները քննադատել է ԱՄՆ նախագահ Բարաք Օբամայի` բյուջեի դեֆիցիտի կրճատմանն ուղղված ծրագիրը, որը նախատեսում է հավելյալ հարկեր գանձել բոլոր այն ամերիկացիներից, ում տարեկան եկամուտը գերազանցում է 1 միլիոն դոլարը: Ինչպես հայտնում է BBC-ն, Բոեները նշել է, որ նախագահի ծրագիրը երկարաժամկետ խնդիրների համար չի կարող լուծում լինել:
ԱՄՆ Հանրապետական կուսակցությունը դեմ է հարկերի բարձրացման հաշվին պետական պարտքի կրճատմանը: Ըստ նրանց՝ պարտքի կրճատման համար անհրաժեշտ է նվազեցնել պետական ծախսերը:
Հիշեցնենք, որ այսօր Բարաք Օբաման Կոնգրեսին ներկայացրել է գործողությունների երկարաժամկետ ծրագիր, ինչը նախատեսում է 10 տարվա ընթացքում 3 տրիլիոն դոլարով պետպարտքի կրճատում: Բացի այդ, ԱՄՆ նախագահը մտադիր է նոր աշխատատեղեր բացելու համար 447 միլիարդ դոլար հատկացնել, և այդ գումարների զգալի մասը նախագահը ցանկանում է ձեռք բերել՝ հարուստ ամերիկացիներից հավելյալ հարկեր գանձելով:
