Այս գիշեր Ուկրաինայի մայրաքաղաքի հրթիռակոծության հետևանքով 10 մարդ է տուժել։ Այս մասին հայտնել է Կիևի քաղաքապետ Վիտալի Կլիչկոն իր Telegram ալիքում։
Ըստ քաղաքապետի՝ տուժածներից 2-ին հոսպիտալացրել են։ Քաղաքի տարբեր թաղամասերում հրթիռների բեկորների ընկնելու հետևանքով այրվել է բնակելի շենքի մի բնակարան, վնասվել են ձեռնարկություն, մանկապարտեզ և մեքենաներ։
Տեղի բնակիչները հայտնել են քաղաքում լսվող պայթյունների մասին, աշխատել է ՀՕՊ համակարգը։ Ըստ քաղաքային իշխանությունների՝ գիշերը Կիևի երկնքում խոցվել է 30 հրթիռ։
BBC-ի ռուսական ծառայությունը հաղորդում է, որ լույս մարտի 21-ի գիշերը հրթիռակոծության վտանգի պատճառով օդային տագնապ է հայտարարվել Ուկրաինայի բոլոր մարզերում։
Իր հերթին Խարկովի քաղաքապետը հայտնել է, մարտի 20-ին ռուսական ուժերի հրթիռակոծության հետևանքով քաղաքում 5 մարդ է զոհվել, 9 մարդ՝ վիրավորվել։ Telegram ալիքում քաղաքապետ Իգոր Տերեխովը հայտնել է, որ զոհերի թիվը կարող է ավելանալ, քանի որ կան անհետ կորածներ․ հարվածը հասցվել է կահույքի արտադրամասի, բռնկվել է խոշոր հրդեհ։
Ռուսաստանի իշխանություններն էլ հայտնում են վերջին օրերին Ռուսաստանի տարբեր շրջանների գնդակոծության մասին։ Անցյալ շաբաթվա սկզբից ամեն օր հարվածներ են հասցվել Բելգորոդի մարզին, զոհվել է 16 մարդ։ Մարտի 19-ին նահանգապետ Վյաչեսլավ Գլադկովը հայտարարեց 9000 երեխաների տարհանում սկսելու մասին։
