Երբ 2008թ. ԱՄՆ-ում նախագահ դարձավ Բարաք Օբաման, ես այն միլիոնավոր մարդկանցից էի, որ կլանված հետևում էի այդ արարողությանը: Ես նախանձ մարդ չեմ, բայց նախանձով էի հետևում, թե ինչպես է ընտրված նախագահն` իր կնոջ ձեռքը բռնած, անցնում ժողովրդի միջով, ու նրան են մոտենում ԱՄՆ նախկին նախագահները: «Առաջին լրատվականի» հետ զրույցում ասաց դրամատուրգ Կարինե Խոդիկյանը`անդրադառնալով Լևոն Տեր-Պետրոսյանի ու Ռոբերտ Քոչարյանի` ՀՀ անկախության 20-ամյակի միջոցառումներին մասնակցելու Սերժ Սարգսյանի հրավերի մերժումներին (Քոչարյանի մամլո խոսնակ Վիկտոր Սողոմոնյանն «Առաջին լրատվականի» հետ զրույցում ասել է, որ Ռ.Քոչարյանը հանրապետությունում չէ և չի կարող ներկա գտնվել միջոցառումներին):
«Իհարկե, կարող ենք ասել, որ պետությունը շատ ուժեղ է, որ կարող է հներին ու նորերին նստեցնել «պետություն» անվան տակ, բայց եկեք չմոռանանք, որ նրանցից յուրաքանչյուրը եղել է ոչ միայն ղեկավար, այլև քաղաքացիների պաշտպան, որի տակ հասկանում ենք, որ Ամերիկայի յուրաքանչյուր քաղաքացի ունի իր ձայնը, ու այդ ձայնը ոչ ոք չի կարող կեղծել»,- նկատեց գրողը:
