«ՌեԱնիմանիա» երևանյան միջազգային անիմացիոն 3-րդ կինոփառատոնի շրջանակում այսօր լրագրողներին ներկայացվեցին փառատոնի շրջանակում Եգիպտոսի ու Բրազիլիայի դեսպանատան օժանդակությամբ Երևան ժամանած` անիմացիոն աշխարհում մեծ ճանաչում ունեցող հյուրերը` Շևեկեր Խալիֆան և Սավիո Լեյթեն:
Վերջիններս փառատոնի մրցութային անվանակարգերի ժյուրիի անդամներ են. Շ.Խալիֆան ավարտական ֆիլմերի մրցութային անվանակարգերի ժյուրիի անդամ է, Ս.Լեյթեն` հեռուստատեսային ու կրթական ծրագրերի:
Շ.Խալիֆան «Պաշտպանություն», «Կայանատեղիի ծառայողը», «Վարդագույն» ֆիլմերի հեղինակն է, նա ՅՈՒՆԻՍԵՖ-ի համար նկարահանել է «Շշեր» և «Սահմանագծին» ֆիլմերը: Ս.Լեյթեի անիմացիոն ֆիլմերը ներկայացվել են Բրազիլիայի ու Հարավային Ամերիկայի մի շարք փառատոներում, նա «Մումիա» բրազիլական հեղինակավոր անիմացիոն փառատոնի պրոդյուսերներից է:
«Բրազիլիայում այս կարճամետրաժ ֆիլմերը մեծ հաջողություն են վայելել: Դրանք գունագեղ, անիմացիայի տարբեր տեխնիկայով նկարահանված ֆիլմեր են: Հուսով եմ` հայ հանդիսատեսը նույնպես դրանք կընդունի»,- ասաց Ս.Լեյթեն:
Այսօր` ժամը 17:00-ին, «Նաիրի» կինոթատրոնում Ս.Լեյթեն կներկայացնի բրազիլական անիմացիայի պատմությունը, ապա կցուցադրվեն բրազիլական անիմացիայի լավագույն կարճամետրաժ ֆիլմերը:
