Բաքվում գործող «Ընտրությունների դիտարկման եւ ժողովրդավարական ուսումնասիրությունների» կենտրոնը նախագահական արտահերթ ընտրությունների վերաբերյալ նախնական զեկույց է հրապարակել եւ դրանք գնահատել ոչ մրցակցային, ոչ թափանցիկ, ոչ արդար: Ուշագրավ է, որ քվեարկության կարգի խախտումների շարքում առաջին տեղում ընդգծված է «ընտրացուցակներում չներառնված անձանց քվեաթերթիկի տրամադրումը»: Արդյոք դա վերաբերու՞մ է նաեւ Իլհամ Ալիեւին, նրա ընտանիքի եւ շքախմբի անդամներին, ուղեկցող անձանց, լրագրողներին, ուժային կառույցների ներկայացուցիչներին եւ առհասարակ ավելի քան երկու հազար անձանց, որ քվեարկել են Ստեփանակերտում:
Այդ մարդիկ Ստեփանակերտում հաշվառում չունեն: Եւ եթե անգամ ընդունենք, որ ԿԸՀ-ն կարող էր Արցախի օկուպացված մայրաքաղաքում «ընտրատեղամաս» ստեղծել, միեւնույն է՝ Իլհամ Ալիեւի հավաքագրած ընտրողները քվեաթերթիկ ստացել եւ իրենց դիրքորոշումն արտահայտել են օրենքի կոպիտ խախտմամբ: Ադրբեջանական Կենտրոնն, այսպիսով, նաեւ այդ խախտումն է արձանագրել, ինչպես նաեւ քվեարկության համար անհրաժեշտ պայմանների, այսինքն՝ քվեախցիկների տեղադրման, բացակայությունը: Նշված է նաեւ ընտրողներին «հատուկ տրանսպորտային միջոցներով զանգվածաբար ընտրատեղամաս տանելու» փաստը:
Ալիեւը Բաքվից Ստեփանակերտ է հասել ընտանիքի անդամների հետ: Նրան, բնականաբար, ուղեկցել են անվտանգության ծառայության, արարողակարգի, նախագահի աշխատակազմի տասնյակ ներկայացուցիչներ, որ օգտվել են պետական փոխադրամիջոցներից: Նույն կարգով է ապահովվել լրագրողների եւ «դիտորդների» ու exit-pol իրականացնող տեղական եւ «ամերիկյան» կազմակերպության ներկայությունը: Կենտրոնը նշում է նաեւ մեկ անձի կողմից մի քանի անգամ քվեարկելու խախտումը: Բաքուն «քվեարկություն» է բեմադրել ոչ միայն Ստեփանակերտում, այլեւ ՌԴ խաղաղապահ զորախմբի հրամանատարական նստավայր՝ Իվանյան համայնքում:
Դա այն դեպքում, երբ ԿԸՀ որոշմամբ Արցախի տարածքում ստեղծված էր միայն մեկ՝ Ստեփանակերտի «ընտրատեղամաս»: Ադրբեջանական կենտրոնի միջանկյալ զեկույցում, իհարկե, այս ընտրախախտումներն առանձնացված չեն, երեւույթները եւ գնահատականներն ընդհանրական են: Այդ Կենտրոնի վերաբերյալ քվեարկությունից մեկ օր առաջ իշխանամերձ մամուլը գրել էր, որ «անհայտ հովանավորից 150 հազար մանաթ է ստացել, որպեսզի ընտրատեղամասեր գործուղի իր ներկայացուցիչներին՝ հրահրելու ընտրախախտումներ, տեսա-լուսանկարահանելու եւ լայնորեն տարածելու համար»:
Փետրվարի 7-ին բազմաթիվ լրագրողներ ընտրատեղամասերից բռնությամբ հեռացվել են: Բաքվում բոլոր տեղամասերը զրկվել են համացանցային կապից, դադարեցվել է հեռախոսային հավելվածների հասանելիությունը: Հարյուրավոր լրագրողներ բողոքել են, որ տեղամասերում խախտումների նկարահանումները «հնարավոր չէ հասցնել խմբագրությանը»: Արգելափակվել են անգամ ձայնային հաղորդագրությունները: «Թուրան» գործակալության խմբագրականը ենթադրում է, որ մոտակա օրերին «Ընտրությունների դիտարկման եւ ժողովրդավարական ուսումնասիրությունների» կենտրոնի տնօրեն Անար Մամդելին «կձերբակալվի»:
Մեծ է հավանականությունը, որ բռնությունների ալիքն, իրոք, կծավալվի: Կենտրոնը, սակայն, հասցրել է նախնական զեկույցը հասանելի դարձնել գոնե ադրբեջանական վտարանդիության լրատվամիջոցներին: Զուգահեռաբար կարճ հայտարարություն է տարածել Բաքվում Միացյալ Նահանգների դեսպանատունը, որով ընդունվում է ԵԱՀԿ Ժողովրդավարական ինստիտուտների եւ մարդու իրավունքների բյուրոյի նախնական եզրակացությունը՝ արտահերթ նախագահական ընտրությունները մրցակցային չէին, Ադրբեջանի իշխանությունները չեն կատարել երկրի սահմանադրության եւ օրենքի պահանջները եւ իրենց միջազգային պարտավորությունները:
