Փետրվարի 5-ին Նիկոլ Փաշինյանի գլխավորությամբ տեղի է ունեցել անվտանգության խորհրդի նիստ, որին բացի խորհրդի անդամներից, մասնակցել են նաեւ Հայաստանի նախագահը, ԱԺ նախագահը, փոխնախագահը, խորհրդարանի արտաքին հարաբերությունների հանձնաժողովի նախագահն ու մեծամասնության խմբակցության ղեկավարը, վարչապետի աշխատակազմի ղեկավարը, : Նիստի բովանդակության մասին պաշտոնական հաղորդագրությունը շատ սուղ է, ըստ էության մեկ նախադասություն. Քննարկվել են օրակարգային եւ ռազմավարական նշանակության հարցեր:
Պաշտոնական հաղորդագրության ըստ էության 90 տոկոսն այն մասին է, թե ովքեր են մասնակցելլ, այլ ոչ թե՝ ինչ են քննարկել: Որո՞նք են օրակարգային, եւ որոնք՝ ռազմավարական նշանակության հարցերը: Օրինակ, կոռուպցիոն գործը, որ բավականին մեծ աղմուկ է առաջացրել Հայաստանում, շոշափելով օրինակ նաեւ ԱԽ նիստին մասնակից պաշտոնյաների ընտանեկան «տիրույթներ», օրակարգայի՞ն, թե՞ ռազմավարական դասի է, եթե հաշվի առնենք նաեւ այն, որ ԱԽ նիստից առաջ փաստորեն տեղի էր ունեցել խորհրդարանական մեծամասնության խմբակցության նիստ:
Այդ նիստից հետո հաղորդագրություն էր տարածվել, թե կարեւորվել է կոռուպցիայի դեմ պայքարն ու մասնավորապես օրենսդրությունը այդ հարցում բարելավելու անհրաժեշտությունը: Թե հատկապես ի՞նչ է ենթադրվում բարելավել ասելով, ինչի՞ց է խորհրդարանական մեծամասնությունը դժգոհ՝ չի մանրամասնվում: Հարցը տեղափոխվե՛լ է ԱԽ նիստ՝ «օրակարգային»-ի կամ «ռազմավարական»-ի շրջանակում: Իսկ, դրանցից ո՞ր «դասի» հարց է դիտվել հունվարի 1-ին Հայաստանի եւ Ադրբեջանի սահմմանին տեղի ունեցած հանդիպումը, սահմանազատման եւ սահմանագծման հարցերի հանձնաժողովների ղեկավարների մասնակցությամբ, Հայաստանի եւ Ադրբեջանի փոխվարչապետներ Մհեր Գրիգորյանի եւ Շահին Մուստաֆաեւի: Այդ հանդիպումից հետո արդեն գրեթե մեկ շաբաթ է պահպանվում է լռություն, չի եղել բովանդակության մասին նույնիսկ մեկ նախադասություն պարունակող պաշտոնական հաղորդագրություն, միայն ասել են՝ սկսվել է, շարունակվում է, ավարտվել է:
Հանդիպմանը միայն սուրճ կամ թե՞յ են խմել, թե՞ քննարկվել են այնպիսի հարցեր, որոնք առ այսօր խնամքով պահվում են հանրային ականջից: Ընդ որում, ուշագրավ է այն, որ այդ հանդիպման վերաբերյալ որեւէ ուշադրություն գրավող արտահոսք չի եղել նաեւ ադրբեջանական կողմից: Սա թերեւս, կամ՝ ոչինչ չլինելու, կամ շատ էական բաներ եղած լինելու մասին է: Իսկ Հայաստանի Սահմանադրության եւ Անկախության հռչակագրի վերաբերյալ հարցերը, այն «դիսկուրսի» շրջանակում, որ բացել է Նիկոլ Փաշինյանը, ԱԽ փետրվարի -ի նիստում քննարկվե՞լ են, եւ դարձյալ՝ ի՞նչ կարգավիճակով, օրակարգայի՞ն, թե՞ ռազմավարական: Վաղը՝ փետրվարի 7-ին, Ադրբեջանի նախագահի արտահերթ ընտրության քվեարկության օրն է: Փետրվարի 5-ին տեղի ունեցած Հայաստանի ԱԽ նիստի ուշադրության կենտրոնում դրա հետ կապված հարց եղե՞լ է:
