Ֆրանսիայի Սենատի հունվարի 17-ի Բանաձեւի առթիվ Ադրբեջանի խորհրդարանի միջազգային հարցերի եւ միջխորհրդարանական կապերի կոմիտեն հայտարարություն է տարածել եւ կառավարությանը հորդորել խզել Ֆրանսիայի հետ տնտեսական կապերը, սառեցնել ֆրանսիացի պաշտոնատար անձանց Ադրբեջանում ունեցած հաշիվները, ֆրանսիական ընկերություններին, ներառյալ Total-ը, հեռացնել Ադրբեջանից: Կոմիտեն, ինչպես Բաքվի լրատվամիջոցներն են փոխանցում՝ «ԱԳՆ-ին հանձնարարել է քայլեր ձեռնարկել Կանարյան կղզիների եւ Կորսիկայի անկախության ճանաչման ուղղությամբ»:
Գործնականում ի՞նչ կհետեւի՝ դժվար է ենթադրել: Բայց Ֆրանսիա-Ադրբեջան հարաբերությունների լարվածության մի, թվում է՝ հավանական, վարկած, արժե դիտարկել: Ֆրանսիայի վարչապետի հրաժարականից հետո ձեւավորված նոր կառավարության կազմում մշակույթի նախարար է նշանակվել Ռաշիդա Դաթին: Նա Փարիզի յոթերորդ օկրուգի վարչական ղեկավարն էր, ավելի վաղ՝ նախագահ Սարկոզիի կառավարությունում պաշտոնավարել է արդարադատության նախարար, Սարկոզիի խորհրդականն էր, երբ վերջինս Ֆրանսիայի ներքին գործերի նախարարն էր:
Ֆրանսիայի եւ Ադրբեջանի հարաբերությունների վերելքը կապված է Սարկոզիի նախագահության շրջանի հետ, իսկ բարեկամության խորհրդանիշը Մեհրիբան Ալիեւան էր, որ արժանացավ Պատվո լեգեոն շքանշանի: Այդ տարիներին նա նաեւ ՅՈՒՆԵՍԿՕ-ի բարի կամքի դեսպանի կոչման է հասել: Ադրբեջանի ներքաղաքական կյանքում այդ ժամանակահատվածը չափազանց բարդ էր. Իլհամ Ալիեւն սպառում էր պաշտոնավարման երկրորդ ժամկետը: Ֆրանսիայի, անձամբ Սարկոզիի կողմից Մեհրիբան Ալիեւային «խաղաղության աղավնի» եւ եվրոպական էլիտային «բարձրաշխարհիկ տիկնոջ» կերպարով ներկայացնելու ընդգծված միտումը հազիվ թե զուտ անձնական համակրանքի կամ մատուցած ծառայությունների դիմաց վարձահատույց լինելու ասպետական կեցվածք էր:
Նույն շրջանումադրբեջանցի մի խումբ մտավորականներ, որ համախմբված էին հայտնի կինոռեժիսոր եւ սցենարիստ Մաքսուդ Իբրահիմբեկովի շուրջ, մամուլում բաց նամակ հղեցին Իլհամ Ալիեւին եւ հորդորեցին, որ իշխանությունը փոխանցի Մեհրիբան Ալիեւային: Ալիեւը, սակայն, ընտրեց սահմանադրական «հանրաքվեով» պաշտոնավարման ժամկետի սահմանափակումը վերացնելու եւ երրորդ անգամ պաշտոնավարելու ճանապարհը: 2016թ. սեպտեմբերին Ալիեւը կազմակերպեց եւս մեկ «հանրաքվե» եւ սահմանեց առաջին փոխնախագահի եւ փոխնախագահների պաշտոն: 2017թ. փետրվարի 2-ին Մեհրիբան Ալիեւան նշանակվեց առաջին փոխնախագահ:
Արաբական միացյալ Էմիրությունների նախագահի պատվավոր ընդունելությանն Իլհամ Ալիեւը ներկայացրեց իրավահաջորդին՝ որդուն: Ադրբեջանցի փորձագետների գնահատմամբ՝ դա նշանակում է, որ Մեհրիբան Ալիեւան այլեւս բարձրագույն իշխանություն չի ունենա: Մեհրիբան Ալիեւայի մտերմուհի Ռաշիդա Դաթիին նշանակելով մշակույթի նախարար՝ Ֆրանսիայի նախագահ Մակրոնն ի՞նչ ուղերձ կամ ազդակ է հղել Իլհամ Ալիեւին, ի՞նչ է հասկացել կամ ենթադրել նա, որ հետեւողականորեն գնում է Փարիզի կամ առնվազն Ֆրանսիայի գործող նախագահի հետ բաց դիմակայության:
Ալիեւը քաղաքական կրետին չէ եւ քաջ գիտի, որ Փարիզը ԼՂ անկախությունը չի ճանաչի, իսկ Սենատի բանաձեւը միայն քարոզչական ազդեցություն կունենա: Մնում է ենթադրել, որ նա կամ Ֆրանսիայի դեմ աշխարահքաղաքական որեւէ կենտրոնի գործիքն է, կամ լուրջ մտավախություն ունի, որ չի հաջողվի իշխանությունը փոխանցել որդուն: Ալիեւը հարավային շրջաններ է մեկնել առանց «երկրորդ կեսի»: 2013-ի նախագահական ընտրությունների քարոզարշավի փուլում ադրբեջանական վտարանդիության աղբյուրները գրեցին, որ նա տիկնոջը Իսրայել «երկարատեւ հանգստյան է ուղարկել»:
